雲海主持嘅商台叱咤903節目《摩星嶺4號》，本月15號已經畫上句號。但種種是非，仍然沒完沒了。周六(22號)當晚，雲海於其facebook開始連載三部曲，講番成事前因後果。而其中，第一part講咗「事發」當晚(即6月8日深夜)，雲海發現節目喺事前事後冇知會情況下，刪走佢近二十分鐘內容，於是致電監製，證實係903高層下嘅決定。雲海再致電相熟DJ兼高層，豈料對方突然同雲海講: 「你離題呀!嚴重離題呀!有人要剪走啲嘢都應該呀!你認唔認先!你認唔認先!」

雲海表示，此番對話令人費解，於是雲海表示「無法談下去」，並於facebook寫道: 「我與此人已絕交!後來更多的對話就不公開了!」

緊接雲海於同一晚、凌晨三點whatsapp903高層R先生，寫道: 「我今晚心表遺撼。」 至翌日中午12點，該903高層R先生先至覆雲海: 「忘記通知你是我們疏忽。」 仲叫雲海翌日下午再傾傾。

6月10號，雲海表示致電903高層R先生，聽完他的一席話。同一日下午4點28分，雲海宣佈請辭。

上述內容，之前已經提過。問題係，究竟邊個係「903高層R先生」？邊個係話雲海「嚴重離題」、最後令雲海決定與之絕交嘅「相熟DJ兼高層」？

聰明嘅雲海，未有指名道姓，但有回應網民猜測。有份回應嘅網民，都係有追開《摩星嶺4號》。雲海於回應誰是「相熟DJ兼高層」時，曾表示: 「通常絕交，我會送大禮物!」 事有湊巧，雲海離開當日，就送咗「三十萬年瑪瑙」畀903助理總監、艾粒嘅Donald。有網民再留言: 「竟然是……三十萬年瑪瑙先生……無法相信。」 雲海即回覆: 「我仲震驚!」

至於誰是決定剪走節目中20分鐘聲帶嘅「903高層R先生」，有聽過《摩星嶺4號》最後一晚嗰集嘅，應聽到雲海特別提到一個人:林夕徒弟、商台總創作林若寧（Riley）。當晚雲海話: 「冇Riley就一定冇《摩星嶺四號》，所以我點都要多謝Riley。」 仲特別點咗林若寧填詞嘅《年少無知》作結。

有網民直問雲海講嗰個R先生，係咪就係林若寧。雲海於facebook寫道: 「我個個都提，已成敵人，更加要提!」 至於為何點唱《年少無知》？雲海回覆: 「thelastsong，高層填詞。」