今時今日一講到地產代理，唔少人仍然會好抗拒，形象始終唔係咁討好，點知遠至北京，都有類似情況發生。
早兩日《北京商報》有一篇嘢，話北京地產代理個朵唔係好馨香，仲用到「數量最多、信譽最差、投訴率最高」嚟形容地產代理行業，踩得咁盡究竟係乜原因呢？

只知樓名同價錢

報道話，京城代理口碑有幾差？只要睇吓唔少房產租售資訊，後尾總會加句：「仲介（即地產代理）勿擾」就知，而近年內地代理界成日爆啲「吃差價、扣押金、虛假廣告、合同違約乃至捲款外逃等『醜聞』」。
報道又話呢個唔係個別代理嘅個人道德毛病，而係成個代理制度嘅問題。
例如合資格嘅代理公司註冊資金普遍唔多，全國代理從業人員攞到職業資格證嘅比例竟然唔夠3%，好多代理只係勉強記住物業名同樓價，只做帶人睇樓嘅「牽線跑腿」角色，業內又冇統一嘅註冊同信用紀錄，所以邊個經紀個檔案花咗外人都唔知。
睇番香港嘅情況，制度上係完善啲，但對經紀嘅投訴，某程度上同內地有啲相似。地產代理監管局主席潘國濂都曾經半講笑咁話，成日收到代理推銷樓盤嘅電話滋擾，代理嘅質素同銷售技巧都有需要提高。