【新增回應】

玩具大王蔡志明孻仔蔡加讚喺13年娶咗「宇宙最強」甄子丹個姨仔汪圓圓，二人三年抱三，生咗大女Celine同一對孖仔Christian同Kameron，真係有仔密密生。

本報讀者謝小姐日前就透過《蘋果》爆相爆片，見到蔡加讚同圓圓帶埋「前世情人」3歲大女Celine去咗星夢郵輪玩，同場仲有加讚家姐加怡兩公婆，但就未見佢哋對孖仔。

謝小姐就見到赤膊嘅蔡加讚抱住囡囡，同圓圓行咗去甲板嘅水池玩水，相片中，見蔡加讚就同Celine落水浸，而圓圓就好似好怕曬，又着長袖防曬衣，又戴帽同黑超，坐喺池邊睇住佢哋兩父女玩：「嗰時係晏晝4點半，見蔡加讚就全程抱住個女，嗰女個樣細細眼好得意，嗰樣似媽咪多啲，由於好熱好曬，甲板好『辣』腳，蔡加讚唔畀佢落地行，見個女全程都好似跟佢多啲，汪圓圓就尾隨，見佢想嗰女戴頂粉紅帽仔，但係嗰女唔肯戴，佢唯有自己戴住，佢哋喺池邊玩咗半個鐘，期間見佢哋點咗椰青飲。」

謝小姐就話呢個郵輪之旅係要玩3日2夜：「估唔到佢哋有錢人都會同普通市民一樣嚟玩遊輪，去泳池玩水，因為消費唔算貴，一個人最平係幾百蚊，最貴都係二千蚊到，住兩晚食足7餐。」

蔡加讚日前同老婆汪圓圓帶3歲大女Celine上郵輪玩過周末，見佢全程當囡囡係小情人攬到實，好細心照顧。《蘋果》今日搵過佢，佢表示：「嗰日係東華三院上面喺郵輪搞慈善活動，我哋去支持吓做吓善事。平時太太陪小朋友時間多啲，難得有機會成日可以陪個女，咪叫老婆休息吓，我就全程陪個女，嗰度小朋友多，比較混亂，所以我就比較緊張，全程攬住佢，兩個囝囝細個，未適合喺嗰度玩水，所以淨係同家姐玩水。」