實施咗近一個月嘅《禁止蒙面規例》，到底有乜用？根本係製造白色恐怖，好似萬聖節前夕咁吖，市民連化個靚妝落街過節都提心吊膽，試問呢個香港點會仲係以前咁自由吖！雖然特首林鄭月娥拒聽民意，但呢條以「先訂立後審議」形式推行嘅惡法，喺民主派爭取下都有得舉行公聽會，但由於名額有限，慎防建制派又壟斷，民主派呼籲大家今朝早齊齊做鍵盤戰士，不停狂按F5掣登記報名。一旦市民成功登記，唔知畀唔畀蒙面出席聽證會呢？

免變建制派一言堂

建制派早前喺立法會《禁止蒙面規例》小組委員會，分別派出以開會嗰陣瞓覺出名嘅民建聯黃定光，以及準備生第二胎、腹大便便嘅新民黨容海恩，成功搶佔該委員會正、副主席職位後，民主派一直要求開聽證會畀市民發表意見。最終小組決定喺本周六舉行公聽會，但當日只限150個名額，仲要係先到先得。

唔少民主派有見及此，呼籲市民記住踴躍報名表態，好似新同盟范國威咁，佢噚日特別喺IG出post，呼籲大家今朝9點去到立會呢個連結
https://app3.legco.gov.hk/ors/chinese/Invite.aspx，準時喺電腦按F5掣，要搶喺最早嘅時間登記報名，以免公聽會變成建制派團體等人「一言堂」。

公民黨譚文豪都叫大家要搶攻，唔好畀建制派成員攞晒嘅發言機會，以免製造好多人支持蒙面法假象，特別呼籲和理非一族上場保護香港人，希望反映真實意見後，更多國際傳媒報道香港真相！