滾石樂隊（The Rolling Stones）70歲結他手Ronnie Wood，今年5月向外透露因肺部病變接受手術，近日佢受訪時驚爆原來當時確診肺癌，仲話已有心理準備與家人講再見。

Ronnie Wood接受英國《週日郵報》（The Mail on Sunday）時透露，於5月時經樂隊醫生勸喻下做咗心、肺同血管嘅檢查，證實佢左肺有腫瘤。

Ronnie同年輕31年嘅現任太太Sally Humphries結婚近五年，Sally去年為佢誕下孖女，而佢喺囡囡出世前一個月先決定戒煙，吸煙已經差唔多50年。Ronnie話等待詳細報告嘅一個星期，幸好有太太陪伴喺身邊，佢話：「我已預備好接受壞消息，但亦有信心。除了醫生，我們沒有告訴其他人，因為不想將別人經歷像地獄般的痛苦。我亦下了決心，就算擴散也不會做化療。」Ronnie話唔係唔相信化療，只係唔想甩頭髮。

好彩，詳細報告出咗後，顯示Ronnie癌細胞冇擴散，佢接受咗5小時手術後已逐漸康復。Ronnie透露現時每三個月要做一次身體檢查，佢話好彩自己發現得早，仲呼籲大家都要去做體檢。