當年今日

大胃王:
合家歡日式放題$88歎過百款美食

蘋果日報 2002/08/13 00:00


一家大細外出用膳,最緊要食得飽又唔貴,貴夾唔飽的菜式可免則免。不如實際些少,食番個選擇多,價錢平的日式放題,三人開餐埋單二百鬆啲,雖說魚生壽司、串燒鍋物、手卷、拉麵全都熟口熟面,但肯定啱口胃,加埋餐廳位於遊樂場一角,細路仔吃個痛快後可馬上閃身玩個樂極忘形!
記者:楊一凡
攝影:伍慶泉、陳穎
鮮活墨魚鍋
適合一家大小享用的放題料理,又點止壽司和刺身?各位好爸媽,不妨先點客鍋物給小朋友暖暖胃,選擇有大路的肥牛肉鍋、雜錦海鮮鍋,清新的豆腐雜菜鍋及鮮甜的鮮活墨魚鍋,全部都用熬足幾粒鐘的豬骨湯打底,然後加入新鮮的金菇、豆腐、雜菜及肉塊。

試味報告:墨魚仔雖然身形小巧,但味道及口感一點也不失禮,墨魚仔在滾熟的過程中,索了些少豬骨湯落肚,所以一咬就咇出來。
爐端燒(上)
地獄拉麵(下)
食日本料理,又點少得串燒?鹽燒雞肉、豬肉和雞翼,鹹香惹味;汁燒牛仔骨、豬柳漢堡、蝦肉條……還有煎餃子和燒魚餅等,口味大眾化,至啱一家大細;看似紅卜卜好鬼辣的地獄拉麵,其實以香辣為主,你亦可選烏冬。

試味報告:細路仔最鍾意食串燒,好彩佢哋唔會燒到燶晒咁熱氣;拉麵同埋烏冬味道唔錯,雖叫地獄,也不至太辣。
蒜茸牛柳粒(上)
鹽燒秋刀魚(下)
大人食飯至緊要有魚有肉送白飯,鹽燒原條秋刀魚,肉質肥美,加適量調味已很鮮甜;蒜茸炒牛柳粒近似中式小菜,牛肉惹味肉汁豐富;另有醬燒豬軟骨,或者清清哋柯打一個麵豉煮蘿蔔及炒野菜。食飽之後可試試甜品布甸或牛油蜜糖粟米。

試味報告:牛柳粒切得大小適中,一口一粒剛剛好,肉質又夠軟熟,醃得幾入味,不會油𣲷𣲷;秋刀魚經鹽燒後不至變得乾身。
車子手卷(上)
宮崎牛肉飯(下)
手卷美味之處是紫菜夠脆,咬落「咯咯」聲,日式放題的手卷選擇有魚翅帶子、吞拿魚、加州、中華沙律及車子手卷(即瀨尿蝦)等,全部即叫即做;宮崎牛肉用日式豉油醃好,味道甜甜,送飯至正,但係點解碗飯咁細嘅?店方知你要留肚試勻其他美食,所以飯量盡少,不然一碗飽肚,點算!

試味報告:要嘗鮮脆手卷得耐心等候,因為手卷知音多的是。日式飯類還有咖喱及燒飯,據老闆透露日式海鮮燒飯配料豐富,深得精明的家長們愛戴。
法式雜果沙律(上)
吉列炸鮮蠔(下)
講起煎炸小食,小朋友至鍾意,炸春卷、咖喱角、日式炸蟹拑、炸豆腐、炸帶子及炸魚柳,夠香口,但都不及炸鮮蠔咁抵食,皆因牠夠肥美又新鮮;卜卜脆之餘,大可柯打一客爽口酸甜的沙律相伴,法式雜果沙律的材料包括果凍、紅腰豆、菠蘿及青瓜等。

Vickie和媽咪試味:一聽見沙律撈咗菠蘿,細路仔實點晒頭話:「我要吖!」乾身酥炸小食跟埋啲沙律一齊食,感覺開胃些少,又無咁油膩。
雜錦刺身及各款壽司
食客一埋位,侍應會醒目地端出一客雜錦刺身給你享用,刺身成員包括甜蝦、三文魚、北寄貝、魷魚、八爪魚及鱲魚等;任點任食的壽司有16款之多,至受歡迎口味是鱲魚、腐皮、海老、蟹子及帶子,而小朋友至愛當然係粟米和鰻魚味。

鄧家父子試味:料理店的師傅手腳都幾快,快得嚟賣相都OK,魚生好新鮮,最重要係壽司飯份量適中,唔會話食兩件就食唔落其他嘢。
店名:銀座福太郎日本料理
電話:23557832
地址:紅磡黃埔花園11期聚寶坊地庫2樓(美國冒險樂園內)
座位:76個
放題時間:任點任食日本料理由晚上6時開始至11時,每人限時一個半小時。
收費:星期一至五成人$78,星期六、日、公眾假期及前夕$88;6至10歲小童一律收$58;身高一米及五歲以下小童一律收$38。
付款方法:現金及信用卡(Master,Visa)