滙控（005）派完成績表，今日輪到渣打（2888）新任行政總裁（CEO）溫拓思（Bill Winters）登場，不過溫總人未亮相，上月底渣打已再度全球執位，8大地區縮至4個，高層地震兼炒魷。
正所謂一葉知秋，獅王舵手歐智華，前日喺香港坐鎮，主持完中期業績會後，晚上再與本港高層（助理總經理以上級別員工）會晤時，就引用歐美外資大行，近年頻見換帥作例子，指企業換血過程，通常唔止換走一個CEO咁簡單，其他管理層亦會受到波及，寓意在座同僚，大家坐埋同一條船，「我所面對嘅挑戰，都係各位面對緊嘅挑戰。」

重申控制成本及支出

如果華華係在座一員，相信會明白歐總弦外之音，就係做高層要準備膊頭承擔，阿頭嘅壓力即係大家嘅壓力，舵手唔掂，大家亦唔太掂，聽完就好拿拿臨返埋位做嘢交數嘞。
歐總解畫會，據聞開場白連答問環節，同佢主持業績會作風一樣，高速高效，半個鐘頭左右搞掂。
除咗綑縛式言論外，歐智華亦重申集團策略重點，就係要keep住成本控制支出，降低風險加權資產增強資本，所騰出嘅額外資本會尋找高回報資產投放，搵到好目標再同大家滙報，搵唔到就回饋股東之類。
不過最有趣嘅係，總部遷冊問題，前晚歐總一句都冇提過，答問環節亦冇人問，似乎遷冊已變成non-issue。
咁嘅情形，同5月初集團公佈完首季業績後，佢喺高層解畫會上，用咗唔少篇幅演繹遷冊研究，可謂南轅北轍，當時聽完佢講話嘅員工，覺得遷冊香港似乎事在必行。不過話說回頭，董事會一日未拍板定奪最佳註冊地建議，一日都可以仲有變數。

李華華
mailto:[email protected]