格鬥狂人徐曉冬20秒KO太極拳師魏雷（雷雷），成為呢排網民既熱話。徐曉冬得勢不饒人，話明會繼續喺武術界打假，仲講唔MIND同人約時間隻抽。一時間，向「狂人」下戰書之聲此起彼落，武林六大門派，除少林外，包括經常出現喺古裝武俠劇既武當、峨眉、青城、崆峒同埋崑崙都話奉陪到底或者不畏戰。原以為武林從此多事，正當大家買定花生等睇好戲之際，國家體育總會、中國武術協會相繼殺出嚟嗌停。中國武術協會仲唔開名咁話徐曉冬有違「武德」打爛仔交，兼且「好勇鬥狠、惡意炒作」。呢次武林大會隨時就咁收場，咁即係無下集「華山論劍」、「六大門派圍攻光明頂」啦。

事實上，呢件事發展到依家已經有好大陣「𤓓味」，先有太極「七子」圍堵徐曉冬，跟住仲有「豬肉大王」出1千萬人仔搵人砌低佢；之後，徐嘅微博帳號突然被刪除，仲有消防部門人員，「無啦啦」去咗徐曉冬位於北京朝陽區嘅武術館突擊檢查，擺明就係要上門搵佢麻煩。啲花生都係收番埋，食多會熱氣，不如去飲番杯涼茶好過啦！

當然，網上仲係口水花四濺，個啲「究竟中國功夫好打，定係西洋功夫好打？」「中國功夫係咪得個樣，到埋牙個陣無料到？」「太極係體操，定係可以攞嚟防身？」嘅陳年問題，又攞番出嚟講一餐。其實都咁多年啦，中國功夫堅定流，仲使問？正如好多「老叔父」所講，好多中國功夫的確缺乏實戰訓練，結果變咗健體操又或者強調功架、招式好唔好睇嘅表演藝術。之不過咁，有啲中國功夫其實都幾恐怖，下下打人哋嘅要害，甚至兩、三招內已可取人性命。如果搞比武大會，講就講成年，但到埋牙咪打個一、兩分鐘，仲隨時因為有人「淆底」而取消，或者中途喊停而要腰斬，咁點好睇㗎！

不過，依家咁都好，武術話晒都係中國國粹，突然多咗人注意，都唔係一件壞事。最離奇嘅係，竟然有網民大拿拿攞1萬人仔出嚟，喺微博好無厘頭咁要求，人稱「國民老公」嘅中國首富王建林獨子王思聰，回應格鬥狂人大敗太極拳師個場比試。諗唔到「閱女無數」嘅王思聰，竟然連睇男人也有一手，佢咁講：「這次徐曉冬雖有炒作嫌疑，但是起碼他在打假，所以我支持。」

你可以話徐曉冬「口臭」，兼炒作新聞想博出位，事實上內地已有媒體起佢底，話佢背後有龐大商業利益嘅謀算。話晒佢已經37歲，喺MMA界中已經係明日黃花，更何況傳聞佢只係打過幾場MMA業餘比賽，仲話佢完全唔入流。佢依家仲唔博出名，舖定未來條路，仲等幾時？之但係，佢又的確講出大家都知道但又唔好意思爆響口嘅事，就係武術界良莠不齊。有些人呃飯食。好似佢近日又爆料指，有內地拳賽「造假」，最喜歡搵日本「拳王」嚟同中國人打，因為啲強國觀眾一聽到打日本人實高興，據佢講「有時主辦方還將蒙古人包裝成日本拳王」。當中有幾多成真，有幾多成假，又係果句：心照啦！

鬼咩，俾人插中死穴，梗係成班人出嚟同人死過。仲有嗰啲自命要宏揚中國武術嘅人，又走出嚟批評下。咪就係中晒計，完全配合緊佢嘅演出。不過，呢批江湖中人又似乎樂在其中，一時間各大門派嘅人都走出嚟抽下水，至少可以出下名喎，唔好咩？又唔係真係要打，使死咩，大家都知咩料啦。正所謂「真人不露相，露相非真人」，真正嘅武術宗師，邊有咁多閒情逸緻咁多聲氣，去理呢啲咁嘅閒事。依家件事炒到呢個地步，咪反映緊中國傳統武術文化失落之後嘅亂象囉。

內地嘅媒體曾指，中國武術有過千億，甚至上萬億人仔嘅市場價值。《新京報》嘅報道仲話，少林、武當、青城、峨眉、崆峒五大中國傳統武術門派旗下產業不知幾蓬勃，開設武術學校授徒、影視文化傳播企業拍劇、拍片，搞旅遊同埋搞手機遊戲軟件等等。仲有各大門派傳人、掌門出席公開活動與商演，尤其係果啲關於太極養生嘅講座或示範活動，上至達官商賈，下至一般庶民百姓都同樣受歡迎，吸金力極強。報道仲話，好多所謂「掌門」旗下不知有幾多公司，收入不菲。

喺咁嘅環境下，邊度仲有人跳出嚟話要「踢館」，爭做「天下第一」咁老土㗎。不過咁，徐曉冬想食呢行飯，就要扮演壞孩子嘅角色，到處辣起火頭，撩交打，係一潭死水裏面攪出一陣陣泡沫，而大家又落力配合「演出」，根本不愁財路。依家「官府」都出手，恐怕「套戲」都要落雨收柴。真正熱愛武術之人，見到咁嘅鬧劇，又點會唔難堪！

花生評論員