鄭保瑞執導、黃秋生同余文樂主演嘅新片《車手》，截至前日為止上映五日票房暫時已經有830萬，睇嚟過1,500萬應該冇問題。鄭保瑞話可能同套戲講警察嘅隱形戰車呢個特別題材有關：「當然唔可以唔講下錢嘉樂嘅飛車場面設計，鬥車嘅場面好人性化，好似兩個武士比武。」
鄭導演同監製杜琪峯對呢個結果都好滿意，所以已經計劃開拍續集，仲話會搵郭富城同鄭伊健幫手演出，同余文樂、黃秋生鬥戲鬥車。
作為車迷同業餘車手嘅郭富城都話好有興趣，佢話可以乘機飛車，仲話可以借出自己收藏嘅靚車開工：「鄭保瑞講就得㗎嘞，出私伙冇所謂，飛車我都隨時候命。」另一個都拍過極速系列電影嘅鄭伊健，話飛車絕對駕輕就熟。

秋生死而復生

喺《車》片中已經死咗嘅黃秋生，鄭導演話一定有辦法令佢死而復生，因為佢係導演喎。另外，今集嘅劇本已經賣咗畀荷李活一間製作公司，開拍荷李活版，鄭保瑞話冇嘢開心得過有人睇得起自己嘅劇本，仲要係外國公司。