又有中國「大媽」出醜聞名國際，其實背後有洋蔥？高爾夫球歐巡賽法國公開賽周四舉行首日賽事，現時世界排名129嘅21歲中國球手李昊桐戰至第11洞時推桿失誤，似乎嬲得滯將支桿劈成兩截兼扔落湖洩憤，呢個時候竟然有位「大媽」掹高褲腳、走落滿佈泥沼嘅湖涉水執桿，最後先發現桿已斷，搞到其餘球手忍唔住笑到碌地，原來呢位大媽正正係李昊桐嘅媽媽！

唔好以為呢件事係笑話，伯母似乎係擔心愛兒喺餘下7洞冇推桿用先出此下策，勁就勁在李昊桐喺冇推桿下一樣捉到「小鳥」，最終以平標準桿71桿暫時並列46位。對於連累媽媽被恥笑，李昊桐事後亦喺微博耍冧：「我在場上生氣，是生自己的氣，不論怎樣，我很抱歉牽連到我媽媽。我愛我媽媽，任何時候都尊敬她，就像你們愛自己的媽媽一樣。我會反省自己，讓自己在場上變得更成熟。謝謝大家的關心！」