財經論壇︳銀行體系結餘和升市近乎零關係(李聲揚)
財經論壇李聲揚銀行體系結餘熱錢
呢排成日聽到,熱錢流入,「銀行體系結餘」(以下簡稱「結餘」)去到4,000億元。有人話係抽新股嘅錢,咁螞蟻上完之後會點?呢4,000億元會唔會冇咁大半?冇完會唔會股災樓災?
畀咗結論你先,「結餘」升跌,同股樓升跌,根本冇乜關係。你可以自己做實驗,圖我畫過,數我計過,相關性近乎零。只講簡單例子,過去咁多年「結餘」有升有跌,但港樓差不多年年向上。講股票嘅,2017年「結餘」勁跌,但港股勁升。之但係去到2018年,「結餘」勁跌,港股又大跌。到今年,「結餘」大升,港股就麻麻地,年初至今都係跌。兩者關係?就係冇關係。
點解會咁?首先要搞清,乜嘢係「銀行體系結餘」。不幸地絕大多數人都係不甚了了,我建議金管局可以出嚟搞個掃盲班。記住,「結餘」,唔係「 香港 或香港銀行有幾多錢」。香港銀行存款有15萬億元,只計港紙都近8萬億元。「結餘」先佔港紙存款5%,總存款3%唔夠。
有冇諗過,有啲外資行在香港冇分行冇存款乜滯,但走去發窩輪,咁要買貨對沖,何來咁多港紙?實情唔同銀行每日就係將啲錢你射畀我,我射畀你咁,到day end offset晒,大約就剩返呢嚿「結餘」在中央夾萬。要記住,銀行係好討厭留低啲錢在金管局中央夾萬,因為冇乜息收。
至於「結餘」係咪「熱錢」?係咪「因為」新股所以流入?可能部份係。但你望吓,過去12個月,銀行體系結餘不停咁升,唔係呢一個月先開始。舊年又話抽阿里巴巴,後來又話抽農夫山泉,而家又話抽螞蟻。喂,做乜上兩次抽完唔見啲錢走?既然上兩次唔走,點解今次又忽然會走?
作為一個做過銀行「炒房」嘅人,我話你知,銀行體系結餘不停升,港紙又不停在強方保證(說好了的走資呢又?),主要原因得一個:就係港美息差,兩地拆息仲係爭成倍。仲唔明?港紙HIBOR息高,美金LIBOR息低,又有聯繫匯率(除非你賭爆煲,但Kyle Bass而家點?),我係「大戶」,梗係借平息嘅美金,然後唱做港紙,然後收港紙嘅貴息。除非聯匯忽然脫鈎(脫完鈎港紙升定跌都未知呀吓,留意吓巨無霸指數),否則冇得輸。就係咁簡單,而你問金管局,就一句答你:「套息活動」。
所以,就算「熱錢」走,銀行體系結餘急跌,又如何?係咪代表港股或者港樓會跌?答案係,冇乜關係。例子好簡單,今年一路都係「熱錢」流入,銀行體系結餘係咁升,但港股港樓照樣弱勢嘛!
講到尾,其實邊個話你知,銀行體系結餘入面嘅錢,係拎嚟買股買樓呢?都話香港總存款係銀行體系結餘嘅幾十倍。螞蟻凍資嘅嗰堆錢,八九成都係借孖展返嚟,原本就不存在,解凍後自然返番銀行入面。
Facebook.com/ivanliresearch
-----------------------------
-----------------------------
-----------------------------
-----------------------------
支持蘋果深度報道,深入社區,踢爆權貴,即Like 蘋果專題及調查組FB專頁 !