韓國收費台tvN嘅人氣劇集《請回答》系列向來係收視保證，由女團Girl'sDay成員惠利擔正嘅新劇《請回答1988》亦唔例外，噚晚播出嘅第3集收視再創新高錄得7.8%，比起上集升咗1%，認真飲得杯落。

呢一集似乎預告有愛情線發生，講述惠利同柳俊烈逃跑躲避班主任嘅追逐，最終同學仔被捉走，佢哋就匿喺牆罅中避過一劫。不過話晒一男一女，二人因身體貼得太近而出現尷尬微妙氣氛，惠利仲察覺到柳俊烈好似有生理反應。返到宿舍之後，佢哋都覺得心亂。

另外，惠利雖然忙於拍劇，但噚日依然同隊友連走兩場活動，下晝先出席簽名會，夜晚再舉行Girl'sDayNight活動，同粉絲分享整靚髮心得。不過天氣又凍又落雨，台下粉絲着住雨褸睇，惠利等人就冒雨演唱，當惠利坐低時個樣仲突然變晒，梗係啦，張凳又濕又凍，真係慘慘豬。