畀神父搞聽得多，倒轉頭搞神父雖然罕見亦偶有所聞，但搞神父仲要搞錯，就確實百年不遇，所以日前芳鄰馮君那單「指勞為湯」烏龍事件，真係笑到我趴低。唔知頭唔知尾的非教徒，乍聽還以為兩位被混淆的神職人員像鼎鼎大名的利瑪竇一樣是老外，所謂我見青山多嫵媚，料青山見我應如是，洋鬼子睇亞洲人向來分不清甲乙丙丁，我們以牙還牙覺得紅鬚碧眼個個似餅印，一點也不值得大驚小怪，面對鬼佬鬼婆，係人都有權馮京馬涼，誤把夏里遜福當威廉達福，我們的馮君還日理萬機，眼大睇過龍好閒啫。後來上網一查，發覺曇花宮花原來都是龍的傳人，只好死死地氣推翻先前假設，改判直男對同性太目不斜視，以致記憶檔案無差別登記眼耳口鼻，鬧出點錯相笑話。

朋友這樣糊塗，本應立即聲明同佢唔係好熟，以免被揭穿蛇鼠一窩，不過念在他第一時間誠心誠意說對不起，倒又樂於攬身攬勢，希望引起物以類聚的誤會。道個歉究竟有幾難，對比明明英文水皮偏偏死雞撐飯蓋的十優前男友，誰的情操較高尚不言而喻。不過話說回頭，我並不贊成事事沙冧，譬如林鄭拒絕為處理疫情不當、累兩對夫婦接踵命喪黃泉而道歉，我就無條件完全支持。連咁嘅「小事」都要講對唔住，她豈不是忙到連屙屎食飯都顛倒秩序？由當年下死力遷移中環天星碼頭計起，她事業上有哪一項決定是不須要向香港人謝罪的，最近十四個月行差踏錯之頻密，更是有目共睹。何況，渣男偷食被踢爆後喊住口承認自己壞咗，都話得啖笑啫，壞到入心入肺的人若然鞠躬道歉，簡直是對「道歉」的侮辱。