Jonah Hill在《狂想》裡面容憔悴，面無四兩肉，加上今次正經演戲並非一味搞笑，反差特別大。作為演員，是有責任控制自己身體配合演出，以往常常有例子，呂良偉增40磅演《跛豪》、基斯杜化比爾操大隻佬做蝙蝠俠，轉頭激瘦扮潦倒拳手再增肥大肚腩V型反彈，不過多半明星都不願意透露減肥餐單，Anne Hathaway更講到明減肥方法講出來怕嚇親人，更不建議坊間跟隨，那Jonah Hill又如何減肥至《狂想》裡的精神病患呢？

其實自出道以來，Jonah Hill都是大肥仔一名，飲食當然沒有節制，但到2011年立下決手，當時與畢佬畢彼特拍攝《魔球》是決定減肥，當時他除了節食，發現狂食日本菜，特別是魚生非常有效，與及戒掉啤酒這減肥殺手，體重一度回落，當時滿心歡喜，但未幾因為拍攝《華爾街狼人》及《War Dog》，前者拍攝時狂吸葡萄糖份搞到要入醫院，後者又因拍攝要求他增肥，體重又再反彈後更加難減，於是忍不住問《囧探出更》同片拍檔查寧達譚，出名肌肉爆燈的他反問一句：「淨係節食，你估我會唔會咁大隻？」於是的起心肝，先搵營養師改善飲食習慣，之後再由跑步開始，逐少逐吋減，直到現在他每天做100下掌上壓。減肥之後仲要串嘴話，而家仲可以飲番啤酒。

精選娛聞，喺晒《娛果》
http://fb.com/appledailyent