噚日係長江基建（1038）一年一度股東會，雖然小超人李澤鉅魅力唔及細佬澤楷，但貴為知名地產商，對傳媒點都有一定吸引力！之不過噚日大家白行一趟，事關小超人食物中毒，noshow！
小超人姨丈甘慶林（即係長建董事總經理）話，老細（即係佢姨甥）食錯嘢食物中毒，所以噚日無法蒲頭，出席港燈（006）同長建嘅股東大會，小超叫佢代向記者朋友講聲唔好意思，同埋問候吓大家咁話。
小超人咁有大家心，大家亦禮尚往來問候番佢，係咁追問阿甘姨丈，究竟小超人病情點樣、喺邊間食肆食錯嘢呀？
最初阿甘姨丈話冇嘢補充，但突然醒起自己係朝早九點零三分，接到小超人電話，連零三分都記得咁精準，唔通姨丈接電話個陣，當正call白車咁處理？

邱德根七公子　重返遠店幫老竇

出街食飯就係唔夠喺屋企煮咁乾淨同健康，而母親節將至，相信好多人就算要大排長龍，都會出街同阿媽食餐好嘅，以表歌頌母愛嘅偉大。
但如果華華係邱達文（邱德根第七個仔），一定會先歌頌老竇，然後先到老媽子！
遠東酒店（037）噚日宣佈，09年2月28日「因要投入更多時間，於本人之其他業務」辭職唔撈嘅執行董事及副董事總經理邱達文，噚日已經獲委任做番以前個位，至於佢點解會返去老竇度「重操故業」，今勻就無解釋。
照華華呢啲八卦外人解讀，理由可以如下：
一．佢自己啲生意唔掂到打晒柴，唯有返爸爸度；
二．遠東酒店管理層諗住開董事會議嗰陣更方便……睇睇個董事局名單就知點解：佢阿爸阿媽同埋六個兄弟姐妹全部响晒度，一家人隨便坐埋一齊食飯，都可以當係董事會議，若然得佢一條友唔係董事，如果真係講公事，唔通叫佢夾啲餸行開食咩！

李華華
電郵：mailto:[email protected]