有錢佬都會搵自己啲仔女接棒，咁佢哋幾多歲先可以退落嚟？咁就因人而異，不過某程度上都係反映佢哋仔女掂唔掂嘅「指標」！近年最快可以「印印腳退休」嘅大孖沙，可能係「棉紗大王」南豐大老闆陳廷驊！查實陳伯近年已經淡出公司業務，專心弘揚佛法，公司大小事務畀晒個女陳慧慧打骰，但華華收到風，慧慧其實最近真正坐正，做南豐揸弗人，完全接手老竇盤生意！
南豐中人爆料，慧慧張新卡片，職銜係南豐董事長兼董事總經理。慧慧接棒後，公司業務方向冇太大變化，但魄力充沛嘅陳家千金，就希望加強南豐嘅品牌，管理比以前現代化……不過華華認為，地產商俾政府追住嚟打，佢哋自己同市建局合作嘅灣仔重建項目都要押後賣。近排港府連番出招規管地產業，睇嚟係時候考驗一下慧慧佢嘅危機管理能力如何嘞！

陳偉成撈返老本行　一腳踏兩船無有怕

有老竇照，就可以等登基，無人照，又點先會有出頭天？最緊要梗係識sell自己畀老細啦！好似以前喺李寧（2331）做執行董事兼首席財務官嘅陳偉成，喺3月份連環做咗特步（1368）同莎莎國際（178）兩間公司嘅非執行董事，噚日佢喺特步個股東會蒲頭。有人擔心佢一腳踏兩船，分身乏術，佢就同華華講唔洗擔心，因為兩間公司都係做零售，特步仲要係佢老本行，一啲都唔擔心唔夠時間喎。
陳董仲話，運動產品呢家嘢，佢真係做咗好耐，好多嘢都駕輕就熟，所以真係唔洗好多時間搞嘅。雖然佢冇講同特步主席丁水波識咗幾耐，但係就話同佢「一見如故」。
陳董仲唔覺意漏咗口風，話其實佢仲係幾間未上市公司嘅董事㖭！咁即係意味陳董拍到好多個好碼頭囉？咁丁主席又點講呢？佢話請陳偉成入局，係希望佢可以幫到特步做長遠規劃，同埋提升公司管治咁話……嘩，兩個豈止一見如故呀，直頭係相逢恨晚啦！

「上帝的銀行家」葛霖　勸唔好賣身畀魔鬼

滙豐控股（005）行政總裁辦公室回歸香江後，神州更加成為獅子行放眼未來嘅聚寶地。世紀海嘯發生後，全球軸心東移，獅子行主席葛霖當然體會良多。呢位傳聞接棒做英倫銀行行長、被英國傳媒稱為「上帝的銀行家」嘅賓架，趁住佢嘅巨著《美好價值》（GoodValue）3月份喺祖國推出簡體字版，佢罕有接受《上海證券報》訪問，暢談金融市場道德同中國崛起。
呢篇名為《新世界秩序建立於真正價值之上》嘅特寫，寫得勁有詩意。葛霖引述書中所載，歌德筆下著名人物「浮士德」（Faust），甘願同魔鬼簽賣身契，出賣靈魂換取權力、金錢同享樂，呢啲影子根本就充斥喺現今嘅世界，市場中人要避免跌入浮士德式風險陷阱，就要竭力重建新世界秩序。葛霖仲話，會繼續加大喺神州大地嘅投資同發展，因為「20年之內，中國將再一次成為世界上最大經濟體」……獅子開大口，其他銀行真係要唞一唞！

李華華
mailto:[email protected]