逆權運動至今超過3個月，不時有的士司機大罵示威抗爭影響生計，連帶的士牌價亦向下，由年初高位561萬元至今下跌9%，最新香港的士交易所資料顯示，市區紅的牌價約為510萬元。

為打探的士行業，記者坐足一星期的士，以乘客身份與司機大佬盡訴心中情。在密封的車廂內，記者遇到黃黃、藍藍司機：有慈父司機，會呼籲社會同情抗爭者；亦有勤力開工的年輕司機，甘願義載；但當然，有正必有反，有司機埋怨示威令「的士業一日唔見400萬元」。

司機1 ：慈父司機

問︰呢排冇乜生意做？
慈父︰少就少咗啲，但影響唔係好大，好似我噚晚3點鐘收工，都做到1,900蚊生意，你話有冇得做？

問︰有冇遇過堵路示威，有咩感受？
慈父︰我都理解㗎，我唔會鬧佢哋，咁咪自己避囉。講真你唔係為自己，係為大家、為大眾。喂，佢哋出嚟抗爭，大熱天時30幾度，仲要有啲着住長袖衫，戴埋豬嘴，戴埋帽。我都唔得啦，淨係企喺度唔好行呀，你都頂唔順啦。佢哋係為咩啫，都係為香港、為香港人。

慈父︰睇到啲片都覺得心悒，啲警察係咁亂棍咁毆。冇獨立調查嘅話，連普遍市民都接受唔到，何況係抗爭者。

問︰如果林鄭落區坐你車，有咩想講？
慈父︰我一定問佢點解唔叫警察克制，只係一味識指摘人，警察濫用暴力呢？速龍點解會冇number？

問︰而家話起多啲樓可以解決問題？
答︰民建聯班契弟夾埋林鄭咋，之前又反對（《收回土地條例》），你而家喺東方頭版賣廣告支持3年（上）樓，之前唔見佢哋咁講，因為驚11月區選選唔到嘛。

司機2：「暴動」大叔

問︰生意好差？損失好大？
答︰香港一萬部的士，兩萬個司機，每更唔見兩嚿水。你同我計一日唔見幾多錢，400萬呀。而家夜晚12點之後條街冇人，係冇人呀，就嚟暴動，係我哋暴動。

答︰晚晚出嚟，玩到幾時先夠。即係我而家表達緊手停口停嘅打工仔意見。我唔知你點睇啦，你有返過大陸嘛。大陸有咩唔好，繁榮昌盛，只係你哋唔鍾意咋嘛。

司機3：年輕爸爸

問︰少咗好多生意？
答︰佢哋懶啫，少咗收入係尖沙嘴做「黑的」嗰班。因為佢哋喺海港城劏遊客，每次500蚊、1,000蚊咁劏，而家少咗遊客咪少咗收入囉。

答︰好多老一輩唔諗，鬧咗先，即係我哋揸的士嘅，個個都係為搵錢咋嘛，你阻佢搵食咪即係等於殺佢父母，好多都唔諗㗎。

問︰有冇遇過前線抗爭者？
答︰有時喺附近可能想兜吓佢哋呀，你見佢真係𡃁仔，望啲身形真係細細粒嘅學生。唔通真係由佢哋喺度俾人打、俾人拉咩。可能佢哋唔關事嘅，咪即刻執佢哋走囉。

---------------------
兩次聚會 六大名家
分享長中短投資部署
立即點擊參加
蘋果動新聞 x 瑞萬通博【亂市投資攻略】
活動詳情： https://bit.ly/2lMN6tE
-----------------------------
基金資料大集合 一書幫你贏盡強積金
點擊即睇《贏盡強積金》電子書

investMAN
For People of Style & Substance
掌握理財智慧 感受生活品味
http://investMAN.hk