渣打前「輪王」翁世權（Simon），上年底重出江湖，轉投瑞士投行瑞萬通博（Vontobel Investment Bank，簡稱瑞通），出任執行董事兼香港上市產品銷售部主管。

經過大半年嘅籌備，瑞通正式打入香港窩輪市場，更加喺今日正式上市掛牌，頭炮兩隻窩輪，分別係騰訊Call（11394）及平保Call（11400），行使價分別係378.8元同70.88元。

瑞通騰訊Call半日成交宗數達1220宗，係半日成交宗數最高窩輪。翁世權就話，好多投資者對呢間新輪商好奇，衝入去幫襯吓，「個個都炒吓試吓你。」

佢透露，瑞通窩輪陸續有嚟，周四同埋下周一，都各有4隻掛牌。涵蓋股份方面，都係以大隻嘅股份為主，包括內銀、港交所（388），嚟緊仲有油股。

Simon又話，現時市旺，不單止係成交額方面，連帶大家信心都好，「呢排市場炒得比較大額嘅人，都活躍咗，今朝我哋隻輪都見啲大炒家出出入入。」反映大家對後市有信心。

蘋果財經，關心你飯碗
http://fb.com/appledailyatm