31歲嘅賴慰玲(Winki)喺今年7月宣佈陀5月，BB嘅爸爸就係拍拖五年嘅舞台劇男友梁子峰，查實Winki曾經喺訪問度講過，佢一早已經有心理準備做人妻同人母，婚期方面，Winki話o依家只欠一個衝動，仲笑話酒席平啲就會結婚，仲話可能會去旅行時突然會結婚添！(新聞連結： http://bit.ly/2wCTK7n )

原來Winki同男友梁子峰喺上個月28號入紙登記註冊結婚，今日Winki接受傳媒訪問，話本來都係打算今年結婚，點知雙囍臨門，陀B已經7個月嘅Winki話：「o依家都唔會大搞，都係屋企人食吓飯，之後再睇下湊B忙唔忙，如果輕鬆嘅，或者先再搞。」

Winki一直都冇公開BB性別，係仔係女都咁錫，所以冇所謂，等生嘅時候先公開，預產期係12月，佢決定順產，之後會主力湊B，如果有工作，佢都會做，絕對唔會息影，之但係佢上緊位，又突然結婚生B，Winki話：「一直以來，由細到大都好想生，再唔生我會好唔開心，呢個年代演員生咗都可以繼續做嘢，一定要好實在咁做，我覺得咁樣係好有動力。」咁鍾意生B，咁會唔會趁後生再追，Winki話：「之後可以順其自然喇！」