曾經係無綫《歡樂今宵》三小花、喺《上海灘》飾演許文強太太及《鹿鼎記》中飾演建寧公主嘅景黛音，神隱32年，一直深居簡出。莫講話偶爾出席公開場合，連景黛音製作人老公楊健恩搞騷，景黛音都冇陪同出席，完全與世隔絕。

直至4年前，景黛音忽然迷上玩微博，不時自拍甫相上網，先至逐漸揭開佢嘅神秘面紗。

勢估唔到，退出娛樂圈幾十年嘅景黛音，近日竟然重出江湖拍劇，但唔係返娘家無綫，而係為ViuTV拍攝新劇《神奇女俠的退休生活》，真係夠晒神奇！

更神奇係，佢今次復出，唔係為興趣、金錢，而係為咗韓國男團SHINee成員李泰民！

＿＿＿＿＿＿＿＿＿＿＿＿＿＿＿＿＿＿

日前，景黛音接受《蘋果》獨家專訪，今次亦係佢32年嚟首次開腔做訪問。講到相隔30幾年再次重出江湖，景黛音以三個字嚟形容：「好恐怖！」

本月初啱啱過咗57歲生日嘅景黛音，化咗淡妝，冇P圖，皮膚同睇相一樣真係好滑溜，老套啲講句，真係保養得宜。

「一個好大原因，就係金廣誠先生（ViuTV製作部副總裁），佢搵我。但講真，我又冇乜邊個想合作，但我喺呢段時間裡邊比較迷韓星，我好鍾意、好鍾意一個樂隊，就係SHINee，其實佢哋五個我都喜歡，係鍾意到不得了。」

鍾意到不得了，原來係去年先至開始。「我好鍾意其中一位成員，佢吸引咗我去欣賞其他成員，就係李泰民。咁啱金總打電話畀我，我又『口痕』，我話我真係冇乜興趣（復出），不如咁，除非你搵到李泰民做我個仔，我就應承同佢拍。佢話：『好呀。』即刻叫公司搵。我覺得如果佢真係咁有誠意搵李泰民同我合作，咁我真係有啲興趣喎！因為我真係好鍾意佢，好欣賞佢。」

【千方百計：透過Rain搵泰民】
景黛音話以前好鍾意韓星Rain，無意中睇到Rain主持嘅節目由李泰民做評判，覺得李泰民好靚仔，於是開始留意對方嘅演出，覺得佢跳舞又叻又有才華，越睇越鍾意之下，連SHINee其餘四位成員都鍾意埋。

不過，由ViuTV出馬聯絡李泰民，景黛音覺得仲未夠，覺得自己都要出一分力，於是乎，佢自己都用盡方法去聯絡李泰民。

「真係千辛萬苦，終於畀我搵到，真係我自己出力㗎！我搵到Rain嘅經理人，直接同佢講去搵佢（李泰民），我哋又搵佢經理人，喺email再通信。當時佢哋有位成員唔喺度（成員鐘鉉去年12月燒炭自殺身亡），佢哋情緒都未平復，可能件事對佢哋係個好大打擊，但我都充滿信心想去做呢樣嘢，我覺得係我唯一可以見我偶像嘅機會。」

【唔想大家覺得你復出好巴閉】
因為言語上溝通問題，景黛音搵咗位韓國人做繙譯，同李泰民經理人書信來往，花咗4個月時間，景黛音終於等到正式答覆：「因為佢哋嗰隊嘅二哥唔喺度，對佢哋打擊好大，佢哋又要做自己嘅嘢，啱啱我度佢哋9月呢個期，要喺日本開26場演唱會，撞期都冇辦法，我可以體諒到件事，因為佢自己都唔想離開自己啲哥哥。」

失望固然之，但成事件已經進行咗一半、且景黛音亦應承金廣誠在先，唔想反口。「佢哋工作已經開始喺度做，我就話不如咁樣，你要我做，我唯一一個條件，我要喺我劇入邊所有嘅人我都唔識，完全未合作過，唔想喺娛樂圈有啲名氣，我想當自己由零開始，唔想大家覺得你復出好巴閉。我又唔想係好耐冇見，唔知點去迎合對方，我唔鍾意人迎合我，我亦唔想迎合人，大家都係零，大家都係平起平坐，我想係咁。」

原本意屬李泰民嘅角色，金廣誠搵咗《全民造星》一班囝囝畀佢揀選，景黛音最後揀咗姜濤。「Interview我有一齊參與，喺我心目中，我比較鍾意啲男仔少啲嘢講，稍為有氣質啲嘅，姜濤。」

【女問：你拍電視有人睇咩？】
今次復出，景黛音話老公一向畀佢自由度冇過問，反而佢17歲女兒唔多贊成。「佢話你拍電視有人睇咩？o依家有人睇電視咩？」

講開女兒，景黛音話其實係個女鍾意SHINee在先。「當年佢貼張poster喺我床頭，我朝朝起身望到張poster，我就同佢講：『你呢張poster幾時可以攞走佢？我真係唔係好習慣朝朝起身見到呢幾個人。』我話畀你聽，嗰隊就係佢鍾意嘅SHINee。」

「依家個女話：『媽咪，你o依家知啦呵？你o依家成日睇啦啊？』被佢窒返轉頭。」苦笑。兩母女雖然鍾意韓星，但未瘋狂到飛去韓國追星階段，只係閒時上網睇片。

【退出逾卅年 因為懶，想享福】
其實當年景黛音有唔少發揮機會，點解要退出？

「一來懶，想享福，要多謝我老公，佢好nice，畀給我充分嘅自由，我個人唔可以勉強自己，我乜嘢都要做我自己鍾意嘅，如果有唔鍾意，我係唔得嘅，我性格係咁樣。我一係鍾意，一係唔鍾意，冇中間，分得好清楚。」

咁多年都冇戲癮？景黛音耍手擰頭話：「真係冇，一啲都冇，今次純粹係好想同呢個韓星合作，我先至會諗住拍，如果唔係真係冇可能。」

愛恨分明、我行我素、直腸直肚、唔愛應酬social，係景黛音一貫作風性格。

但呢種性格，其實好難喺娛樂圈生存。

景黛音認同：「係呀，冇錯，所以我咪唔喺呢個圈生存囉。」

「我自己好知足，我覺得我係一個好幸福嘅人，個女又唔使我擔心，佢係乖嘅，老公又好錫我，媽咪又好錫我，我覺得好OK囉。我做到自己鍾意做嘅嘢就好滿足㗎喇。」

雖然景黛音拒絕透露新劇內容，但單單睇劇名《神奇女俠的退休生活》，似乎正正係景黛音嘅人生寫照。

採訪：戴彩煥
攝影：林德雄
攝錄：葉君海、沈健程
場地：MAGIC3

精選娛聞，喺晒《娛果》
http://fb.com/appledailyent