7年沒有開個人演唱會的蘇永康，今晚和明晚在紅館舉行《ALL THAT JAZZ (&POP) LIVE 2019》演唱會，這次演唱會蘇永康和超過90個中西樂師合作，吸引不少圈中人捧場，當中包括蔡一傑、上山詩鈉、歐陽震華、杜德偉太太、梁漢文夫婦、蔡一智夫婦、杜如風、歐陽德勛夫婦、陳山聰和女友等等。

演唱會晚上8點30分開始，康仔身穿紫色長褸現身唱出《浪淘沙》，唱完便和觀眾打招呼：「大家好，多謝大家嚟到我第5個個人演唱會，係咪好奇怪呢？頭先嗰首作品係一個樂壇巨人嘅作品，我想同大家講今晚嘅次序，首先係我前半生嘅音樂回顧，因為我仲後生，喺85年我17歲嘅時候加入樂壇，最初嗰兩、三年，我都去咗拍電視劇，因為好尷尬，當年嘅唱片公司冇幫我出唱片，但自己就唱咗隻《浪淘沙》，所以第一首歌就唱呢首。」

康仔續說：「用咗幾年時間拍電視劇之後，去咗另外一個空間，香港之寶黃霑先生，佢喺80年代搵我唱廣告歌，如果你哋生於7、80年代，應該聽過好多廣告歌由我唱嘅，以下呢首如果大家聽開都會知道。」之後唱出《Sol#4》。

兩首歌後，康仔問觀眾知不知道剛才的是甚麼廣告歌，大家都答檸檬茶，康仔便說：「證明大家都有咁上下年紀，因為講得出係檸檬茶都係嗰啲年紀。」

康仔又指入行時很感激鍾鎮濤先生，他說：「佢當初同我講：『你個樣都...』」後來全場大笑，康仔再說：「大家心照啦，但嗰時我只係得18、9歲，佢叫我要學製作，對我音樂嘅路更加深，真係好多謝B哥哥。到93、94年，我試過喺studio入面28小時冇離開過，嗰時仲後生，所以唔覺得辛苦，又好多謝媽媽冇打嚟問我去咗邊，等我可以專心做嘢。」之後唱出《沒有季節的火花》。

唱完《沒有季節的火花》和《讓我暖一些》後，康仔又提到當年花了很多努力在這張唱片，但唱片公司給予的支持很少，所以他創出先河，自己帶着唱片行台(去電台宣傳)：「好多啲DJ朋友好鍾意啲歌，特別係《讓我暖一些》，當時同華納嘅吳奇隆鬧出雙胞胎，佢都唱咗同一首歌，當時首歌仲攞到商業電台流行榜第一位。」康仔又說：「當時喺樂壇有個潛規則，就係如果你嘅歌唔可以喺卡拉OK熱播的話，就證明係唔受歡迎，當時上天畀個提示我。」之後彭嘉麗在台邊升上來，兩人合唱《從不喜歡孤單一個》。」

-----------------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX