陳志雲、陳鍵鋒、廖碧兒同謝安琪噚日出席喺尖沙嘴舉行嘅《冰天動地》記招，陳鍵鋒以往下半年都會返內地拍劇搵真銀，所以好少出席無綫台慶，不過今年因為佢套劇延遲咗拍，咁佢就會參與節目巡禮。講到台慶頒獎禮，陳鍵鋒話都係朋友同佢講，佢先知自己一個提名都冇，佢話：「我都覺得好愕然，我都有同陳生（陳志雲）講過，佢就話冇留意喎，可能因為今年只有10個藝人入選，所以冇提名囉，不過我覺得咁就唔夠民主，唔夠透明同公開，有時一套劇有幾個人做得好，但名額得10個，咁會局限咗。」佢仲自嘲自己可能未符合公司要求，所以冇提名。
對於陳鍵鋒覺得頒獎禮唔夠透明度，陳志雲話：「我哋會接受所有人嘅意見，今年得10個藝人可以入圍，希望大家覺得有份提名好難得，仲想票數可以集中啲，以前都試過50個，我哋會再檢討。」

得寵助手避合照

此外，陳志雲前晚去九龍灣出席健康快車慈善音樂會，佢如常帶住助手叢培崑行孖咇，在場記者即影佢哋嘅合照，助手避忌閃開。其實陳志雲一向對助手寵愛有加，唔計較佢惹官非，仲成日做「人肉生招牌」着佢設計嘅T-shirt，令佢有機會為張敬軒同Stephy設計演唱會紀念品㖭。