近年潮流興「插水」，唔知係咪因為拜仁慕尼黑最近戰績麻麻，搞到連好波之人波勒都要用旁門左道，佢響禮拜二歐冠盃對AC米蘭扮俾人拍親，狀甚痛苦，最後換嚟一張黃牌，都幾瘀皮。
呢單嘢發生響上半場中後段時間，波勒響禁區內俾AC米蘭嘅卡拿迪斯纏住，糾纏間卡拿迪斯隻手可能真係拍到佢，但佢慢半拍之後先至成個跪落地，個動作真係太着迹，咁嘅演技恐怕連三歲細路哥都呃唔到。如果佢想插水插得高明啲，應該一早請教吓AC米蘭個「扮嘢王」恩沙基嘞。

恩沙基踢到殘要唞吓
講開恩沙基，最近佢真係着晒火，入波多之餘重係開季以來唯一踢足每場波嘅AC球員，佢踢完拜仁場波後，都公開話係時候唞吓。呢位仁兄最近同有心病嘅迪比亞路鬥入波，又話想染指歐洲足球先生。𠵱家連佢自己都話要充電，可想而知佢真係好疲倦，教練安察諾堤應該識做啦。

奧尼爾自謅中鋒絕種
NBA嘅中鋒呢幾年真係買少見少，今年更加嚴重缺貨。伊榮剛剛退休，莫寧腎虧唔打得波，𠵱家又傳奧拉祖雲因背傷可能提早收山。睇嚟NBA啲中鋒可能好快成為「瀕臨絕種動物」，就連奧尼爾都話佢係NBA最後一個中鋒。不過難道「巨無霸」忘記咗我哋身高七呎五吋嘅新秀狀元姚明，如果佢都唔算係中鋒，邊個算係？