十二月四號係全城大日子，今日飲完茶就應該去維園，為自己又好，為仔女抑或子子孫孫都好應該企出嚟表態，唔好真係要等到七十歲老人仙遊，至可以見到普選一天。其實內地高官應該好明白，香港人唔係暴民，遊行都只係和平表達意見，由八八直選爭取到𠵱家，都係表達我哋嘅決心啫。
賭王何鴻燊早前估計今日最多五萬人，噚日已經開始改口，政府當然唔想咁多人上街，所以今日下晝有唔少假日活動，勞動到一啲高官出動，好似喺跑馬地有一個基本法演講比賽，就有民望之冠嘅問責高官律政司司長黃仁龍出席；財經事務及庫務局局長馬時亨就發揮愛心，下晝去長沙灣出席義工活動；漁護署喺沙田搞咗個漁農產品節；民政事務總署喺騰龍墟搞創藝坊。

民建聯搞寵物show

除咗官方有活動，一啲「民間」組織都有活動任君選擇，特首夫人做會長嘅香港紅十字會，就喺時代廣場擺放愛心叉叉熊，話要同你講有關「愛和分享」嘅故事，學習樂觀面對人生嘅態度。啱啱上市嘅領匯就喺鯉魚門搞卡通人物展覽，會計師公會喺中環遮打道搞兒童攤位遊戲。至於支持政改方案嘅民建聯，除咗喺馬鞍山搞大型運動會外，喺西環就有寵物show。
佢哋係唔係有心想拉散條遊行隊伍當然話唔埋，但其實市民關心香港嘅前途一定多過關心寵物，當然○七/○八有普選就最好，但係就算二○一二至有都冇問題，最重要話畀我哋聽幾時至見到岸，而唔係拖字訣，以為啲人行完就唔記得！


爆料熱線：29290000、27860099
報料傳真：26239278
報料電郵：[email protected]