過馬路要小心，就算冇亂過馬路，都唔一定安全。噚晚黃大仙下邨發生咗單交通意外，有個20歲女仔喺行人過路線過路，點知突然有架電單車直衝過去，撞到個女仔彈開幾呎。鐵騎士同電單車上嘅乘客都倒地受傷，一齊送院治理。

事發地點係黃大仙下村對出近巴士站，噚晚大概7點9，30歲姓凌鐵騎士揸部電單車載住33歲姓郭男乘客，沿東頭村道向鑽石山方向行駛。當電單車駛到現場嘅行人過路線時，撞到一位過緊路嘅20歲姓林女途人。

蕭先生當時揸私家車喺對面線，等緊行人過完路先開車，車Cam拍到經過。蕭先生話當時行人過路線上好多人行緊，突然間對面線有部電單車駛到，「收都唔收吓油就直衝過去人群。」佢話見到個女途人直頭俾部電單車撞到彈開4至5呎，跌喺地上；而電單車司機同乘客亦都倒地受傷。

蕭先生話喎：「有人過緊路，冇停撞埋去，肯定係部電單車唔啱！」之後佢見行得車，有途人幫手打電話報警，佢就揸車離開。警員事後到場，證實涉事鐵騎士無飲酒，調查緊意外原因。至於3名傷者，好彩都係手腳或身體受傷，送院時都全部清醒。

你敢爆，我敢獎！ 即Call《蘋果》24小時爆相爆片熱線 ：63836568

P03
■電單車撞到正在過路的女途人。讀者蕭先生提供圖片