林嘉欣首次與劉德華合作，在新戲《掃毒2天地對決》中飾演夫妻，嘉欣表示與華仔首次合作出奇地有默契。嘉欣分享夫妻間着重溝通，同時容許夫妻間有自己的秘密。

現年40歲的林嘉欣笑言：「我呢個歲數，唔係做人妻就做人阿媽，唔通做學生咩。不過，《男人四十》到而家，戲路冇固定，驚慄又得鬼片又得，次次唔同，選擇戲路都好吃力，做演員好被動，有啲嘢未做過好想嘗試。」與劉德華相識多年，卻是首次合作，嘉欣說：「同華仔合作好開心，諗唔到識咗咁多年先至第一次合作，但大家默契好好。出奇地大家冇合作過，但係一埋位華仔俾到我好大信任，我成個人交咗俾佢，我哋第一場戲就嘈交，嗰場戲係難，大家冇一個過程，一開始就要鬧交，要放手俾大家，印象深刻，講出我哋天大嘅秘密，結婚裏面嘅瑕疵。」嘉欣的角色出身於律師家族，外表得體，學歷優秀，嘉欣說：「個女仔性格上有潔癖，要求完美得體，當自己有隱瞞時，性格上有重大瑕疵，又驚失去丈夫不想隱瞞，拍攝時感覺到華仔攬到我好實，feel到自己瘀晒，大家都好肉緊，咁樣場戲先至唔會假，真係好投入，絕對有火花。」

剛拍完《廉政風雲》隨即為《掃毒2》拍攝，華仔讚嘉欣很快投入演出，嘉欣說：「佢唔知我背後做咗幾多嘢，因為第一次同華仔、邱禮濤導演合作，一日頗多場戲，我唯一驚自己處理唔到，一日內要情緒起伏好大，由好sweet到嗌交，邱禮濤導演出名快手，我驚跟唔到，但今次做咗好多功課，希望大家滿意，一日拍晒屋企戲，因為夫妻間有秘密，彼此隱瞞，要講500個大話去圍護1個大話，令二人冇辦法一齊嘅原因。」劉德華墮馬意外之後，為《掃毒2》拍一場拉頭馬戲，嘉欣說：「有真馬喺度，我比佢更緊張，叫佢唔好喺後面行，如果發生喺我身上我都好驚。」

嘉欣與華仔的戲份主要描述夫妻間溝通，嘉欣坦言自己重視夫妻之間溝通，她說：「溝通好緊要，兩個大人之間，關於小朋友教養，一定要不停溝通，如果我有事放喺心，係唔會容許超過12點，我要攞出嚟講，舒服我先瞓到，我好彩係瞓得食得嘅人，我瞓唔到就好大件事，溝通係要一齊成長。」對於夫妻之間能否有秘密，嘉欣說：「當然可以，唔會有人完全認識你，我都未必完全認識自己，女人喺唔同階段都會變，我容許有秘密，我都唔介意佢有秘密，好難要求有人完全明白自己，冇傷害性係可以。秘密不是隱瞞，問我都會講，唔問我就唔講。」嘉欣指維繫婚姻的最大要素是包容，嘉欣說：「經歷20、30年的婚姻，會有唔吸引的時候，要去包容對方，我都唔會365日都咁吸引。」

戲中的嘉欣因為生育問題，受盡困擾，嘉欣說：「自己冇遇過生育問題，但好多朋友會遇到，由其是居於大城巿，生活壓力大，飲食不定，女仔好多生理、情緒問題，開拍前都有問好多朋友嘅私密，有啲每日要打荷爾蒙針令自己可以排卵多啲，例如要補充藥品，男人都有遇到嘅問題，實在好多外來因素，好似夫妻間有好沉重嘅石頭，認識好多夫妻要睇婚姻輔導，如果出現怪責，婚姻就會出現陰影。」戲中嘉欣不能生育，丈夫卻有私生子，嘉欣說：「如果老公有私生子，我梗係唔接受，有邊個會接受呢，不過，人越大冇乜嘢會驚喜，任何事都會發生，一定要正面去處理，有小朋友嘅夫妻，就要逼自己去面對。」

採訪：張俊銘
攝影：仇志德、馮嘉銘
場地提供：The Mira Hotel
化妝: will wong
髮型: hin wan

------------------------------
【每周送10萬】
升級壹會員獨家尊享，立即參加10萬火急大抽獎 !
*推廣生意的競賽牌照號碼：52302-9
-------------------------------
錶迷必讀！
89頁腕時計電子書 66款嚴選年度新錶
https://hk.adai.ly/e/v7jEA0MC1X