韓國女神全智賢去年2月為圈外人老公崔俊赫誕下慈姑掟，今日宣佈懷第二胎，目前正懷孕10周，預產期於明年1月。全智賢之前拍完劇集《藍海傳說》就做返廿四孝媽咪及老婆，除咗現身代言活動外都甚少公開露面，最近一次公開露面已數今年4月25號。

當日女神一身全白打扮出席代言嘅HERA活動，純白連身裙、白色高踭鞋加上其招牌黑色長髮，大晒其高挑纖瘦身形，仙氣十足，不過細望之下女神個樣似乎有啲攰。而今日女神宣佈陀B 10周，數返日子女神當日現身活動時應該剛懷孕不久，唔通受孕吐困擾？