向來好打得嘅特首林鄭月娥，終於肯喺聖誕假放假五天，交畀政務司司長張建宗留守添馬艦鎮守大局！娥特放假到底去咗邊？佢自己喺Facebook揭開謎底，罕有po溫馨全家福，包括少有出鏡、喺美國讀書嘅細仔林約希，原來係一家四口同遊桂林籚笛岩，相中嘅林鄭仲好似小女人咁，撓住老公林兆波同大仔林節思嘅手。

林鄭喺Facebook留言，話此行驚歎「洞奇」、「石美」嘅景觀，但更難得係可以享受天倫之樂。而日前佢已經喺Facebook賣關子，預告會搭高鐵去桂林，但冇透露係全家人把臂同遊。

林鄭同時亦喺Fb上載短片，話今年係佢同屋企人喺禮賓府過嘅首個聖誕節，好開心囝囝分別由北京同美國趕返嚟參加特首辦嘅party。