民主派同建制派聽日喺立法會修訂《逃犯條例》法案委員會大戰在即,有人噚日發現喺法案委員會主席「阿涂」涂謹申嘅立法會議辦水牌上貼滿打氣便條,當中除咗叫「涂主席加油」,亦有人留言寫上:「啲人成日話香港靠晒後生仔,計我話都係涂主席你最可靠,星期六加油!」同埋「薑越老越辣,今鋪睇你頭,加油啊!涂主席必勝!」
阿涂接受八方查詢就話,噚日朝早喺議辦發現便條後好鼓舞,話過去好少收到咁色彩繽紛同窩心嘅嘢,透露近日出街時多咗巿民同佢講「辛苦你」同「加油」,老婆亦傳來好耐無傳過嘅加油WhatsApp短訊,令佢好開心。佢噚日將便條收好放喺辦事處近門口位置,令自己一入門口就睇到。