【《西謊極落》慶功宴】一條毛巾搞到囡囡笑晒 張繼聰自嘲分享症發作
雨僑周柏豪張繼聰林敏聰分享症西謊極落太爆太子太空艙
「分享症」其實並唔係女士們嘅專利,爸爸張繼聰都自認有呢個病,但呢個病並唔使睇醫生,只要大家能容忍到佢就ok喇!今日佢又病發,係ig到上咗同囡囡張靖(Karina)玩嘅短片,玩乜?其實真係好簡單,只係用一條毛巾仔,從高空漂到Karina身上,佢已經笑到騎騎聲,原來快樂真係好簡單!
而噚晚佢就同周柏豪、雨橋同林敏聰等去尖沙嘴出席電影《西謊極落太爆太子太空艙》慶功宴,老闆蕭定一更宣佈票房截止前日有810萬。張繼聰就自言今次與一班搞笑能手如林盛斌(Bob)、林敏聰同蔡瀚億(BabyJohn)合作:「柏豪嗰角色比較正常,但佢都好有幽默感天份,如果有機會開續集,可以畀佢表演吓,佢嘅喜劇感好強。80、90年代搞笑有五福星,曾志偉嗰班,我哋唔多講自己係五福星,近年少咗幾個人,五個咁一齊做喜劇,我哋高矮肥瘦樣樣都有,應該滿足唔同觀眾。」
周柏豪就講到同林敏聰同阿Bob合作好好玩:「成日開工覺得好好笑,唔使個人咁蹦緊,同埋呢套戲知道好多住屋問題,林敏聰係大前輩,組常爆好多gag,就算真係好,假又好,講到件事好好笑。」另外,周柏豪透露聽日要返廣州做巡迴,嚟緊到出年每個月國內都有巡迴演出,所以要keep住身型,已經有40幾日冇食過飯。
另外,雨僑被問到佢男友羅力威之前暗示求婚,希望會兩年內結婚,佢就話:「今年自己都好多工作要做,好多作品,未有咁快結到婚,喺戲裡面好鍾意煲湯畀客飲,好多人問我識唔識得煲靚湯,其實我識嘅,希望襯呢個商機開返間阿麗靚湯。」講到有無煲靚湯畀男友飲,佢就自言對方嫌三嫌四:「佢唔係好飲湯,煲起時候,熱又話熱,撻凍又話唔飲,男人飲湯係咁,佢唔飲,唯有我飲。」