【李八方online】新保安局長爭凳仔 「衞」國爭「光」?
李家超曾國衞區志光逃犯條例鑽石公主號武漢肺炎
噚日入境處曾國衞主動見記者講解「鑽石公主號」後續工作,區志光都有陪同,平起平坐孖住登場。林幸泉攝
一場疫症,打亂咗好多人嘅部署。政圈一直流傳特區政府極有可能喺2、3月重組班子,甚至連特首林鄭月娥都親口提及過重組,但武漢肺炎殺到,盛傳換人安排推遲咗。《逃犯條例》修訂主責官員、保安局局長李家超一直係被換首選,甚至據聞佢都唔介意落台,之不過時辰未到,包括有傳林鄭屬意接班嘅首選唔肯入熱廚房。
點解抗疫當前,重提換人一事?皆因一場政府接送滯留日本「鑽石公主號」港人返港嘅大騷,再次引來政圈竊竊私語。今次負責帶隊「迎送」港人返港嘅入境處處長曾國衞(57歲)早成接任保安局長大熱,而佢喺當地對港人無微不至,親自去機場安排港人上機、又落手落腳幫佢哋搬行李,又漏夜同隨團同事開會傾「營救」計劃,對俾傳媒任問唔嬲咁,霎時惹嚟政圈唔少注視,猜疑係咪視呢次為「考牌作」,希望大家留個好印象。
與此同時,同樣隨團嘅保安局副局長區志光(58歲),落力度其實都唔輸蝕過曾國衞,唔通有心更上一層樓?睇返過去幾任保安局局長,如葉劉淑儀、李少光同黎棟國都係入境處長出身,唔少人相信曾國衞先係真命天子。又咁講吖,李家超任係首位警隊出身嘅保安局局長,結果一場反修例運動就凸顯,由警隊出身嘅人掌保安局,似乎都幾災難性,區志光都係警隊出身,如果由佢升呢,難免又令市民諗起縱容警暴問題。
噚日入境處主動call傳媒會面,由曾國衞親述「鑽石公主號」後續工作,一場港府久違咗嘅面談安排,加上保安局嘅區志光都孖住登場,令呢對「拍檔」嘅動向,更受關注。
之不過講嚟講去,最實際嘅問題梗係:「幾時換馬先?」有政界人士估計待疫情穩定,甚或等到9月立法會選舉塵埃落定,皆因政府擔心臨近選舉突如其來舉措,又再炒熱反修例運動,搞冧建制派選情嘅「黑鑊」,孭一次就夠。
-----------------------------
【未敢忘記】03年沙士重溫
立即按此 -----------------------------
無懼警暴 學懂自救
《抗暴之戰●法例須知》
讀果 上架
-----------------------------