千億新抱徐子淇（Cathy）噚日以「香港救助兒童會」首位亞洲贊助人身份，喺尖沙嘴出席記招，同大家分享佢同父母，仲有6歲囡囡Hayley去尼泊爾探訪嘅經歷，佢講到探訪一個受上年地震影響嘅家庭，雖然個媽咪要照顧兩個有殘缺嘅小朋友，但仍然好樂觀面對，感觸到喊咗出嚟。佢話：「我覺得佢好勇敢，做媽咪覺得好攰，都會呻辛苦，我好佩服佢，要跟佢學習。」

「佢體會到要珍惜」

Cathy又話原本今次嘅探訪，係帶埋大女、二女同行，但大女最後因為發燒冇去，Cathy話：「Hayley開頭都驚，去到個地方，佢問係咪有人住？我同佢講喺地震前有人住，佢好驚，話想返屋企，不過之後去到學校同啲小朋友玩，心情輕鬆咗，返到嚟之後，唔使𠱁就好快食晒啲嘢，仲會叫細佬食晒食剩嘅嘢，知道佢體會到要珍惜。」
Cathy仲話都有同老公同家人分享啲片同相，佢哋都覺得好值得幫助，仲話一定會帶小朋友再去探訪，佢話：「每個小朋友都想帶，但係我發現分開帶都好，因為佢哋如果三個一齊就掛住玩，單獨嘅話，可以令佢哋明白多啲。」
撰文：馮仁昭