樓市大好，地產代理行賺個盤滿缽滿，聽聞龍頭地產代理行嘅中原集團，上半年業績勁標青，兩大股東施永青同王文彥，雖然一向不和，見到咁嘅成績，自然唔使愁，仲實行有福（係口福）同享，擦餐勁嘅﹗
上個禮拜喺尖沙嘴漢京樓，王文彥就自掏腰包，筵開三席獎勵中原嘅員工，聽講每圍萬幾銀，成班中原集團高層同後勤團隊，四十幾人齊齊赴宴，當然唔少得主腦施永青。

細味前塵　不談業務

難得兩股東聚首一堂，華華當然關心賺咁多錢嘅中原集團，會唔會重提上市一事。不過，唔知係咪眾人皆知兩股東作風向來唔同，兩人席上都只係話當年，風花雪月之餘，細味前塵往事，有關業務嘅嘢都放埋一邊，盡情大快朵頤。
雖然席間無提上市嘅事，但赴宴嘅人講，王文彥間唔中都會以股東身份出席公司宴會，由公司畀錢，好似呢次自掏腰包嘅情況就好少見。今次王生請食飯，意味王生認同中原集團嘅領導同管理方法，意義重大。
雖然股東對上半年成績收貨，但中原咁大嘅集團，就算唔搞上市，都要維繫業務，開拓水源，聽講除咗展開大中華策略外，仲進軍新加坡同埋台灣，實行中、港、台、星四地發展。
李華華
mailto:[email protected]