樓市旺,除咗本地薑趁機會買樓投資,外籍人士都唔放過入市機會。中記區凱恩話,一名外籍設計師,剛剛以六百八十萬,連租約買入灣仔星域軒二座中層,七百三十呎,每呎九千三百幾。
呢位外籍客,好了解香港物業市場,知道灣仔向有唔少中環金鐘上班族租住,所以買個單位投資,肯定唔怕冇人租。況且,重係連租約買入,𠵱家月收萬九蚊,回報三厘四,五月約滿後,預期新租金可以升至兩萬五千,回報升至四厘四。果然係精明投資者。
呢位外籍客嘅朋友,剛剛買賣二手樓有斬獲,唔怪得佢對熾熱嘅二手交投一清二楚啦!
凱旋門樓梯響
矚目豪宅尖沙嘴凱旋門,市場人士等開售,已有一段日子,行內擔心,準買家熱情逐漸減退,新地今日喺中環國金中心商場,搞Baccarat水晶示範單位預展。
雖然唔係正式示範單位,開放畀傳媒同公眾參觀,但至少資料逐步曝光,止吓渴先,等市場重記得有個焦點豪宅盤就快登場。
噚日見到預展會現場重趕緊工。雖然接連有富豪排隊預留,但負責銷售人雷霆話,未攞到售樓紙,未賣得,最快下個禮拜,至可以正式開放示範單位。