當年今日
關於我們

【短片】【一個月暴瘦15磅】得番88磅 千語BB胃酸倒流食幾多嘔幾多?

蘋果日報 2015/07/21 06:00

蘋果千語BB暴瘦一個月即時胃酸倒流15磅食幾多嘔幾多

俘虜咗當家小生林峯嘅吳千語,未有疊埋心水入「峯」門做少奶奶,仍然想喺事業上繼續搏殺,未知係唔係太過拚搏,似乎捱出病,今日有周刊指,千語BB居然喺一個月內,體重狂跌15磅,面色焦黃,眼袋都現埋出嚟,成個人好似落晒形,唔似平日嘅「開心果」。

據周刊報道講,千語BB近日停工休養,原來係受胃酸倒流影響,由103磅瘦到得88磅,上周一被影到現年22歲嘅千語BB出西環寓所買嘢,就要一個外傭成程傍實,雖然千語BB平日都係好瘦,依家再瘦多一個碼,身形成個瘦到變紙板人咁,塊面豬仔仲有啲似皮包骨,即顯得頭大身細,真係我見猶憐!

其實,上個月千語BB出席活動,佢都講過自己太瘦,要搵營養師及健身教練畀意見,等佢可以增肥10磅,據知,千語BB胃酸倒流,雖然冇影響日常進食,之但係佢有時就食幾多、嘔幾多,目前又靠化妝keep住個靚靚樣,原本今年6月佢就會拍中港台新片《賞金獵人》,依家仲要學韓文,遲啲要去韓國開戲,目前因為千語BB身體唔係太好,有份演嘅李敏鎬、楊冪等均要改檔期。

周刊又指,千語BB早前憑電影《王家欣》獲美國獨立電影獎影后,依家唔可以食住個勢再開戲,相信千語BB都畀咗自己唔少壓力,當中最肉痛嘅當然係男友林峯,中咗BB降嘅林峯一直好錫女友,不過,佢喺內地忙開工,撞啱女友千語BB又唔舒服,但係千語BB接受周刊訪問,就話自己冇事,係做運動先fit咗!

本報今日向吳千語經理人求證,佢透過短訊回覆:「冇啲咁嘅事!佢身體非常健康!謝謝大家關心,剛剛韓國富川電影節回來,跟著會為新戲試造型及做一些前期準備工作,新戲預計9月份開工。」