想喺拔萃男書院留名千古，有錢就得。拔萃仔最近喺校園一條無名小徑聞到銅臭味，發現路邊名牌寫住「靜思小徑」，英文名「ListerT.S.ChangTrail」。拔萃仔大怒，開facebook群組反對小徑以捐款人命名，結果新名牌插咗一日就俾校方移走。
呢條斜坡上嘅小徑隔籬有條私家車路，由男拔校舍通往亞皆老街，好多拔萃仔叫呢兩條路做「Drive」。facebook群組「平反Drive的名字，維護拔萃尊嚴！」簡介：「Drive，是拔萃的一部份。是拔萃仔的集體回憶。是大自然的創造。Drive，不屬於任何人……為了四百萬，拔萃放棄了尊嚴，放棄了引以為傲的傳統文化……」群組開咗兩日，超過800個拔萃仔加入。
捐款人ListerChang係「工商界政改動力」發起人之一嘅張作鑫，係男拔舊生，旗下公司做好多物業買賣。男拔校長張灼祥向八方堅稱唔知發生乜事，已經即日叫人移走個牌，「係咪捐400萬、冠唔冠名，我冇跟進，驚講錯。捐款人唔喺香港，未正式confirm晒」。佢又話新名牌係「試位」，個名點改法仲有得傾，「我都覺得擺嘅位唔好睇，係工程部嘅事。應該拎返先，再從長計議」。

八方翻查男拔籌款網頁，原來大把校園設施都有得冠名籌款。買禮堂個名，盛惠400萬；課室仲抵，每間40萬蚊咋。張校長話，呢個計劃做咗七年，係院校常見籌款方法，男拔有好多課室都係咁，但佢覺得小徑用人名冠名值得商榷，「小徑用呢個名唔係咁好，我覺得叫拔萃小徑好啲，中性啲。有個人捐錢修葺係好事」。條小徑喺百幾年前創校時已存在，五十年代由泥路轉為石徑，張校長話好多拔萃仔混淆咗兩條路個名，校方叫小徑做footpath，私家車路先叫drive。
男拔籌款委員會主席張宇人將呢單嘢攬上身，話Lister係佢好朋友，細細個行呢條小徑返學放學，好有感情，「呢條小徑本身冇名，新名又唔係粗口、不雅，好多校友唔覺得有乜問題」。張宇人同張校長都驚學生「誤會」，以為係將條私家車路命名，話會向反對嘅拔萃仔了解一下。

mailto:[email protected]