【韓流】去年認戀27歲李俞英 44歲金柱赫自爆想結婚生女
金柱赫李俞英
將於下月3號踏入45歲嘅韓國男星金柱赫,於去年爆戀細佢17年嘅韓片《姦臣:色誘天下》女星李俞英,兩人亦大方承認戀情。
金柱赫近日完成短篇劇集《Argon》嘅拍攝,噚日接受媒體訪問時大談劇集,就算問到女友佢亦不避嫌大方回應。金柱赫指兩人正好好地交往,而已屆適婚年齡嘅佢亦坦言想結婚。
金柱赫於劇中有一個正踏入青春期嘅囡囡,而今次係佢首次飾演人父,有唔少人都表示佢喺父親一角表現得尷尬,不過金柱赫受訪時就指自己想要生女:「我成日覺得男仔可以唔需要任何人咁,好似咩都自己搞得掂,身為父母的話會覺得好孤獨,但囡囡的話會撒嬌,而且亦會同媽咪好似朋友咁相處,各方面都好好,所以未來生女會好啲。」