當年今日
關於我們

中環在線:中國礦業解畫救股價 - 李華華

蘋果日報 2007/03/27 00:00


上個禮拜隻中國礦業(340)俾十幾個不利傳聞攻擊:管理層內訌、董事被捕等,搞到股價插水。最初傳媒冇指名道姓,公司就冇得澄清,直至有一間點咗佢名,先可以名正言順出通告,副主席兼行政總裁陸健(圖)噚日特登見記者解畫。
陸健笑住話,上個禮拜比平時過多好多次海關,若果有事早就俾人拉咗。其他董事雖然個個身處異地,但仍然聯絡到,出通告前查問各董事(包括獨立非執董)同主要股東,包括3個基金股東同超大(682)主席郭浩,大家都冇收過任何官方查詢。咁就奇嘞,點解突然走出咁多嚇人傳聞,而且日日升級?
收購哈爾濱松江銅業單deal講明要向市場伸手,佢話一定會發新股,可能會搭啲CB(可換股債券),等下月中中國礦業同松江一齊公布06年業績後出通函,跟住同大摩去做路演,咁可能有人想個股價跌低啲方便入貨;又可能同早前收到一封匿名信,話可以搞掂松江響山西項目嘅批文,不過就要畀錢,但公司已攞到國土資源部採礦權,所以冇理,如果唔係就真係要去CCB(商業罪案調查科)或廉記飲咖啡。
可能係呢個澄清傳入市場,中國礦務午市反彈快咗,最後收1.95元,升番9.55巴仙,不過離高位2.45元仲有兩成距離,都咪話唔傷。
[email protected]