當年今日
關於我們

【與麥明詩同屆】尖子「大口黃心穎」投靠葉劉從政 戥容海恩被嘲唔抵

蘋果日報 2017/06/07 00:01

新民黨葉劉淑儀劉聖雪容海恩麥明詩

「十優港姐」麥明詩小時候已立志從政,希望做一位有影響力嘅人,但成為港姐冠軍之後,就選擇進身娛樂圈。反而,當年曾被指係麥明詩勁敵,有「大口黃心穎」之稱嘅劉聖雪(Dana),16強止步後,卻輾轉加入政壇,跟隨葉劉淑儀所屬嘅新民黨,並曾為容海恩(Eunice)做助選。
呢位90後女生,學歷與麥明詩一樣咁勁,畢業於美國名牌學府加州大學聖地牙哥分校生理及神經科,回港後,曾分別於香港大學及中文大學醫學院,進行鼻咽癌及幹細胞研究工作。Dana噚日接受《蘋果》電話訪問時,坦言研究工作比較沉悶,所以決定參加港姐挑戰自己,佢話﹕「當年係因為媽媽叫『你試吓啦!』,咁就擔粗粗報名,但最後都係入唔到。」
Dana坦言未能進身最後12強,確實受到好大打擊,佢話﹕「當時無綫話有third in,但09集合,嗰邊07先send message話『唔好意思,你入唔到』。嗰朝早真係好失望,係崩潰喊晒囉,因為報紙都出咗,好多朋友都知我參選,last minute先通知,我諗TVB要保存機密性啦。」演藝夢落空,Dana覺得塞翁失馬,焉知非福,佢話﹕「後來諗番,入唔到唔重要,原來仲有另一條路俾我揀,現在呢條路我更加開心,覺得好有挑戰性同滿足感。」
問到點解會選擇新民黨?Dana解釋﹕「我覺得新民黨喺眾多黨派中立場同理念係較理性嘅,做實事,是其是,非其非,政府有嘢做錯都會照鬧,唔係樣樣嘢都buy晒,同我立場相近先揀佢。」
對於容海恩經常成為網民笑柄,Dana護主心切,話要為容海恩抱不平﹕「我同佢相處咗10個月,一直跟住佢,佢份人好率直,對身邊人好好,從來唔鬧我。其實佢都率直得好可愛,希望大家手下留情。」