香港電台一直係唔少建制派嘅眼中釘，不時發炮轟主持人偏頗。前立法會議員、工聯會王國興今日就向香港電台台長梁家榮發公開信，抗議同譴責《城市論壇》打壓言論自由同硬銷政治立場喎。

亡國興話6月3日應邀出席《城壇》討論3.11補選回望同前瞻，聲言喺接近最後環節時段被主持蘇敬恆「不禮貌、不公道、不公平、不尊重地」單方面熄咪，對此遺憾同譴責，認為嘉賓喺《城壇》唇槍舌劍係常有之事，但指蘇作為主持卻冇保持中立公正，反而「滅本人正義之聲」，指做法偏頗、偏幫同無理，打壓言論自由同侮辱嘉賓，仲話對方以提醒口脗呼籲市民出席六四集會，覺得係公器私用，硬銷偏頗政治立場，要求港台解釋，仲話為咗自己嘅尊嚴同言論自由，以後唔出席由蘇敬恆主持嘅《城壇》，甚至呼籲愛國愛港陣營做好被熄「咪」嘅打壓嘅準備喎。

其實蘇敬恆唔係第一次被建制派投訴，據聞因此落馬冇得入政府做政治助理；今次亡國興重錘出擊，建制派肯定乘勢發難，香港電台睇路咯！

蘇B回覆八方時就話嘞，《城市論壇》係理性討論平台，海納百川，希望喺有限時間內盡量多聽不同人士之意見，等觀眾、聽眾有效接收多種不同立場嘅論述，希望各界人士把握、珍惜言論自由空間同發表政見機會，加強與市民大眾溝通，共同維護論壇嘅秩序。