中芯國際(981)自從公布第4季業績後股價持續下跌,上星期五有國內報章話,公司擬分拆國內有盈利嘅北京12吋晶圓片廠房在國內A股上市,但對股價依然無幫助,續跌4%。呢單消息,唔單止係老調重彈,而且可信性成疑,因為國內A股同香港相似,要有3年盈利紀錄至上得市。
據國內報章所講,由於國內「即將」出台的政策支持,鼓勵集成電路企業上市,故中芯有「可能」獲特殊處理,用字認真可圈可點。其實國內大把優質企業排隊上市,而且國家也正嚴防股民亂買股票,較次質的公司獲安排上市機會,可想而知。而就算成功分拆又如何?只不過多了一筆特殊盈利,對改善業績似乎作用不大。
睇番中芯去年第4季業績,表面轉虧為盈120萬美元,但扣除出售資產所得逾4000萬美元後,實際仍然虧損逾4000萬美元,總計全年虧損都係約4000萬美元,即係唔計出售資產,虧損高達8000萬美元,數字相當驚人。
早前電台節目主持人話,對呢間公司要向前望,「與時並進」不要向後望,因為前景好重要過一切云云。既然係咁,睇過業績之後更加唔好對中芯前景過份憧憬,不幸買咗的話,股價如見有反彈最好沽咗算數,咪再留戀。