當年今日

馮仁昭四圍超:鄭中基森美鬥型 飽死街坊

蘋果日報 2004/07/02 00:00


由鄭中基同森美主演嘅電影《我要做Model》破咗千萬票房關口,梗係開心到爆啦,不過前日佢哋喺經理人公司傾傾吓票房,竟然拗起上嚟,Ronald話森美減肥之後,唔夠以前咁得意,叫佢增肥,森美就話Ronald雖然搞笑,但唔夠佢有型靚仔,兩個人講到㷫烚烚,結果決定走去做街訪,睇吓邊個正啲。
Ronald同森美喺尖沙嘴海港城為啖氣做街訪,森美夾硬攬住個OL做訪問,重問人哋佢係咪好有型,可惜呢位OL話睇過套戲只覺得Ronald鬼馬,唔覺森美有型,搞到佢勁冇癮!好彩後來有位妹妹真係讚森美靚仔,Ronald即刻話:「你見過靚仔未㗎?佢極其量只可以用順眼嚟形容,頂晒籠咪靚仔過我!」Ronald同馮仁昭講,佢好鍾意同森美鬥氣,因為森美轉數高口才好,兩個人好有火花好過癮喎!

7.1有排忙
講開又講,上年Ronald俾人影到7.1遊行當日去曬太陽,事隔一年,佢就冇咁梳乎,噚日佢上午要錄音,夜晚要去紅館做許冠傑演唱會嘉賓,遊行同曬太陽都冇佢份。另外,Ronald同森美喺《我》片入面嘅造型,亦都變成近期大熱嘅網上個人身份AVATAR遊戲,登陸now.com.hk,大家可以喺網上試着佢哋嘅靚衫,重可以用呢啲造型打機㖭。

周迅秘密嫁咗人
近排傳出內地演員周迅同台灣知名造型師李大齊秘密結婚,台灣傳媒於是向周迅嘅經理人李小婉求證,佢冇否認,但係話周迅結婚嘅事,唔應該由佢嚟回應,重話如果周迅真係結婚,咁就大家一齊祝福佢哋啦。佢重透露周迅呢幾日會由成都去北京,灌錄十一月推出嘅專輯。
張藝謀力谷劉三姐
張藝謀噚日喺廣西嘅陽朔出席《印象.劉三姐》百場紀念演出新聞發布會,佢喺記者會入面話,經過一段時間反覆修改之後,呢套劇嘅演出已經去到成熟嘅階段。《印象.劉三姐》自○四年三月公演以嚟,已經吸引咗近二十萬中外觀眾捧場,既然張大導自己都咁滿意,睇怕各位戲迷應該充滿信心啦!

蜘蛛俠殺入本港破紀錄
喺美國大獲好評嘅新片《蜘蛛俠2》,前日喺本地開畫,收咗二百九十萬港元,成功打破《明日之後》近日喺本地開畫所創嘅二百一十萬港元紀錄,成為今年本地開畫最收得嘅外語片。而《蜘蛛俠2》喺本地開畫嘅成績亦好過第一集,當年第一集嘅開畫票房,係二百三十九萬港元。

賈靜雯同林志玲鬥身價
台灣女星賈靜雯嘅經理人姚鳳群向台灣傳媒爆料,話有內地富商出價一百萬人民幣(約九十五萬港元)搵賈靜雯陪食飯,重多過台灣名模林志玲嘅三百五十萬新台幣(約八十一萬港元)喎,佢重話食飯加過夜嘅價錢更加去到四百萬人民幣㖭(約三百七十多萬港元)!據聞賈靜雯知道呢個消息後嘅反應係:「內地人太有錢了!」
empty
森美周圍問人佢有冇型,真厚面皮。
empty
郭晉安
empty
張藝謀
empty
周迅。資料圖片
empty
賈靜雯