MV全數落架丨莫文蔚着D&G遭小粉紅狙擊 經理人公司跪低後即退熱搜榜
莫文蔚玻璃心小粉紅
真心覺得小粉紅好忙,忙出post、忙翻牆check網、忙圍剿目標人物,唔知係咪因為人工低,所以一有機會密密出post賺嗰一個幾毫……
最新目標人物,是噚日起開始喺香港紅館開緊人生最後一次大型巡迴演唱會莫文蔚(Karen)。話說一向好夠膽玩形象的Karen去到盡,五十路都仲
扮魔法少女影宣傳海報,成功引起話題。而佢日前推出新歌《婦女新知2021》時,繼續走colourful路線,仲攞咗張相嚟做微博profile pic,不過,有人認出嗰套衫係意大利著名品牌Dolce & Gabbana(D&G)嘅出品,咁就出事喇!
由於
D&G喺2018年捲入辱華風波,引嚟一班搵人仔嘅中港台明星齊齊發起杯葛行動嚟表忠,而喺風波後,一路未有人夠薑挑戰呢條底線,而Karen就成為「第一人」。雖然Karen方面一索到唔對路即換走頭像,但班小粉紅見狀梗係即刻「開工」,圍插Karen着辱華品牌,而「莫文蔚 杜嘉班納」更成為微博熱搜榜熱門詞No.1!最後Karen方面乾脆換相,息事寧人。
鬧爆Karen辱華嗰班人,有狠鬧,亦有懶可惜咁鬧,包括「我以為大家都忘了杜嘉班納那個事件了呢,看了這個熱搜莫名感動」、「可真的好惡心哦,一邊吃着你的飯一邊砸着你的碗」、「確實是有穿衣自由,不過希望別來賺中國人的錢了」。仲有啲係一啖砂糖一啖__:「她私下穿甚麽是她的自由,畢竟人家並不是中國人,也不在意杜嘉班納侮辱整個亞裔,但請圓潤的滾開大陸,MV裏公開穿辱華品牌,還來掙錢就是你的不要臉了。」「穿甚麽是個人的自由,粉轉黑也是我的自由!既然不在乎中國人的感受,那就滾吧!」OK,最叻叫人「滾」或「滾出中國」,典型小粉紅特色,完全不意外。
而撐Karen嗰班,相對地清醒少少,有人話:「有些網友一天天跟義和團式的,到處出警,我就喜歡莫文蔚,這麽低調的人都要被嘴……一件衣服就能鑒定愛不愛國,你愛的也太輕飄飄了」,亦有心水清嘅網民叫大家check清楚Karen嘅國籍先,亦有人指Karen嫁作德國新抱,所以佢根本唔算係中國人。
另有網民諗到一條雙贏嘅妙計:「作為理性的中國人我們應該繼續聽她的歌,看她的電影,然後繼續抵制杜嘉班納,不買它的產品。既讓偶像吃上了飯,又氣死杜嘉班納,理性看待,雙贏不好嗎?」議論紛紛,相當好笑。
件事至今仲有班小粉紅自high圍爐狂鬧,只係想提返句:小粉紅出post前,唔該睇吓自己用緊咩牌子嘅手提電話先,咪以為用咗件made in China嘅貨就當自己愛國、撐國產至得㗎……
Karen因着D&G服裝被指辱華,遭大陸小粉紅圍攻,今午約2點時仍在微博熱搜榜,以386萬的數字雄霸榜首。(微博圖片)
有人叫Karen索性將國籍改回中國籍,以後着漢服。(微博圖片)
另有撐Karen派嘅,叫其他人唔好郁啲就扯上辱華。(微博圖片)
事件經過幾個鐘發酵,涉事單位相繼道歉,負責今次Karen MV形象設計、馬天佑旗下造型師Yoyo關諾衡就被「祭旗」,馬天佑喺個人微博中發表道歉聲明,並點名負責嘅設計師承擔責任,馬天佑指:「因考慮不周導致極其惡劣影響,對莫文蔚小姐以及大眾表示十分誠懇的歉意,對不起!(中略)對於部分選用服裝並未充分考慮到品牌形象及歷史是極其嚴重的疏忽。本工作室及旗下造型師團隊表示萬分的歉意,並承諾在今後工作中將更加嚴謹把關,避免同樣事件發生。」
Karen嘅經理人公司「莫家寶貝工作室」選擇向人民幣低頭,工作室喺官方微博出post稱:「針對《婦女新知2021》MV中的服裝審核出現問題,工作室此次沒有嚴格替藝人把關,疏忽對於品牌的問題的深入調查,造成大眾十分不好的觀感,對此表示萬分的歉意,希望得到公眾、媒體以及一直以來支持藝人的粉絲朋友們的原諒。」工作室又指,已經審視現時合作中嘅品牌,並第一時間通知各平台將MV下架,又承諾:「相關造型也不會再出現在這次新專輯任何的宣傳當中。」
至傍晚時份,原本喺YouTube可以睇到嘅《婦女新知2021》MV,已經被移除,畫面顯示「上載者已移除影片」,明顯係斬腳趾避沙蟲嘅做法;而喺Karen嘅IG中,所有今次《婦女新知2021》嘅相片,包括非D&G浴袍嘅相,都被清得一乾二淨,跪得相當徹底。
而原本高踞熱搜榜上的關鍵詞「莫文蔚 杜嘉班納」,在Karen跪低後突然在榜上消失得無影無蹤。該關鍵字在今午約2點,曾以386萬雄霸榜首,同日晚上9點,榜首位置讓給了只有346萬的「周也 冷臉美女」,比起「莫文蔚 杜嘉班納」少了約40萬。
為《婦女新知2021》填詞的Wyman晚上在IG貼出一張「SORRY NOT SORRY」的圖片,配以《婦女新知2021》其中一句歌詞「哎喲 唔係故意 我只係特登」,然後再留下「#抱歉我不抱歉」及「# 婦女新知2021」兩個tag。《抱歉 我不抱歉》則是台灣歌手A-Lin去年的歌曲,亦是由 Wyman填詞,歌詞包括「笑對公審 管他們 讓我們 做我們 」、「他們說 太真實 惹討厭 戴著假面 被愛更可憐」、「他們說 太真實 要改編 我堅持 忠於原著 一刀不剪」,未知是否相關。
不過平時Wyman都習慣在IG引用歌詞為歌曲宣傳,有網民估計Wyman只是為Karen 宣傳,未必是為MV出頭。《蘋果》向Wyman查詢,他回覆:「哈哈,唔係回應呀,噚晚寫通宵,今日傍晚先起身,未上網睇新聞,完全唔知發生咗呢件事。如果你有留意,其實平時派咗新歌,我都會抽啲歌詞出嚟配圖出IG配合宣傳,只係咁唧。你知我性格,都唔係退縮怕事嘅人,如果要回應一定大大方方,唔會唔認,不過今次真係唔係,只係有咁啱得咁蹺唧,所以亦無理由順便抽水。」
馬天佑喺自己微博中,貼出道歉聲明,並開名讓設計師孭鑊。(微博圖片)
Karen的經理人公司亦喺微博發聲明道歉。(微博圖片)
在經理人公司跪低後,「莫文蔚 杜嘉班納」在熱搜榜消失,有大陸人嘲「這很微博」。
負責填詞的Wyman一向有引用歌詞為歌宣傳,晚上轉發一張「SORRY NOT SORRY」的圖片,配以歌詞「哎喲 唔係故意 我只係特登」,未知用意。(IG圖片)
Karen的經理人公司承諾呢批涉事相片唔會再被用喺宣傳上。(微博圖片)
-----------------------------