即將卸任中大校長嘅沈祖堯報喜，本身為著名腸胃及肝科學家嘅佢，一早帶領十五個亞太國家嘅專家，喺2004年起展開大腸癌篩查研究，定下清晰普查指引，於亞太地區提倡大腸癌篩查，最近佢榮獲「2017國際Herbert Falk大獎」，表揚喺腸胃病學嘅傑出成就。

呢個獎項喺今年10月喺德國柏林舉行嘅第209場Falk Foundation e.V.研討會上頒發，祖堯BB致辭時話呀，好榮幸獲獎，指團隊呢次嘅研究，旨在搵出慢性炎症性腸病病例，尤其喺亞洲地區持續上升嘅原因；作為腸胃學家，佢期望呢項研究可以搵出引致炎症性腸病嘅風險因素，等大家知道應採取乜嘢預防性措施或基層醫療干預策略，最終幫助全球人類改善健康狀況。

國際Herbert Falk獎由Falk Foundation e.V. Freiburg基金會創立，以紀念Herbert Falk醫生同鼓勵於診斷、治療及防治腸胃疾病有突出貢獻嘅人士。