渣打大班御用司機陳祺威，近半個世紀駕着公司房車穿梭中環，見證香港蒼海桑田及樓起樓拆的變幻。載過的七位大班各有特色個性，唯一共通處「係佢哋都好親民無架子，同佢哋講嘢都唔需要特別有所顧慮。」英資行大班作風紳士，大老闆與小職員之間也可以有不少細膩互動，在風塵樸樸的車廂世界以外，展現久違了的人走並未茶涼港式溫情。

回望28年揸大班車歲月，位位老闆各有特色。首名大班黎恪義由銀監過檔，「做事較正統」但其實好關心下屬；相處時間最耐是共事7年半的前亞洲區舵手白承睿；第一位唔駛講番文的華人老闆是王冬勝；與現任老闆洪丕正初相見，對方聲如洪鐘印象最深。

人走人情在，大班與小職員再見亦是朋友。陳祺威說，白承睿退休後回印度打理生意，「但佢生日我生日，都有send短訊畀對方……Sullivan（渣打香港前一哥蘇利民）都係，有次我生日，佢太太捉住請我飲茶……之前佢哋返嚟香港大家都有見面。」

集團前主席戴維思（Mervyn Davies）曾駐紮本港，「佢個女Laura，由10幾歲我睇到佢做咗媽咪……Davies退休時，都有offer畀我去英國探佢。」

白承睿是印度人，喜歡在車內聽印度音樂，又數度邀請Albert欣賞寶來塢電影；因諧音相近，市場中人替Jaspal起了「叉燒包」綽號，「佢知道自己個花名係叉燒包，但完全無覺得咩冒犯，仲覺得幾funny囉！」

對方初到香港人生路不熟，他就像接待家人般，盡心照顧洋老闆需要：白信奉錫克教，他接載大班到銅鑼灣錫克廟做禮拜；對方鍾意食，他就捐窿捐罅做美食大使推介地道佳餚。

記者：劉美儀