香港警察連大肚婆、細路女都唔放過，不過專欄作家禇簡寧就建議香港嘅「最高領導人」林鄭月娥，頒返個紫荊勳章畀推跌大肚婆、膝壓細路女嘅警察，表揚吓佢哋。

大家唔好誤會，禇簡寧唔係撐警，只係反諷啫，事關佢都質疑，做過父母嘅人都知，小朋友覺得危險就本能地作出反應，試問仲有咩比全副武裝嘅防暴警更令細路女覺得驚？

講起林鄭，禇簡寧單刀直入話，既然林鄭都表示佢作為特首，有權任命或罷免法官、又有權批准立法會嘅某啲工作，咁不如唔好叫林鄭做特首，直頭叫佢做「最高領導人」好過。

之但係喺外國，譬如美國嘅市長之類嘅「非核心領導人」，都尚且會同情據稱被警暴嘅受害人，反而身為人母嘅林鄭呢咁都做唔到，甚至12名港人被送中後，林鄭連支持吓嗰12人可以搵律師都講唔出。

褚簡寧覺得，根本依家嘅香港唔係被恐懼統治，直頭係被恐怖統治，事關而家立法會實際上係無能為力，而司法獨立亦遭到攻擊，佢只希望法官可以拿出警員膝壓女童嗰種勇氣嚟反擊。

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！