當年今日

異動空間:溝貨溝到無錢 - 魏力

蘋果日報 2015/09/30 00:00


上回講到目前係清倉消失、等大戶攻唔到你的時候。倉位歸零,不等於連指數企乜位都唔知。股票要照睇,才能在市場恐慌時出手去撈。當你無揸貨時,判斷自然會較客觀準確,就如7月初股災當日,揸重貨點會唔跟斬?事後睇番當然戇居,但恒指100點、100點咁落,揸重貨者見個倉不斷縮水,必然想一沽以謝天下,魏力初學股時也是膠事做盡,相當清楚。
睇開小弟文章或fb,最常見係「嚴守15%止蝕」呢句,係人都知,但真正做到者寥寥可數。不止蝕也罷,更甚者是越跌越溝。近排有個pm魏力的case,2個幾溝到8毫子,買到無晒錢,家陣得3毫幾,問應該斬定死守?輸緊七八成先求救,肯定唔會止蝕。邏輯上,第一注買入後坐艇,已代表睇錯方向,為何要在錯誤的決定上再加注?
止蝕最大好處是保本,有本自然能玩落去,股災時無貨在手,才有閒情逸致去搵股撈。7月8日午後,恒指越跌越恐怖,但科網股如網龍(777)已企穩反彈了,魏力3點後亦於fb提出可開始撈,成功捕捉到之後兩日的急彈。炒股要贏可以很簡單,最大的障礙卻永遠是出於自己。

魏力
http://www.facebook.com/2012jason