高志森、鄭敬基、邵音音噚晚喺銅鑼灣出席電影《朝花夕拾‧芳華絕代─拾芳》優先場，高志森早前喺美國洛杉磯舉行嘅「第十四屆中美電影節」奪年度最佳導演獎，高志森話：「拍咗40部戲以來第一次攞導演獎，話以前拍笑片攞唔到獎，呢部戲都有幾個笑位，但大部份係感人。」

為《朝》片做服裝造型嘅焦媛，明年喺大陸做百多場《金鎖記》巡迴，對於有傳焦媛患厭食症，高志森承認有點心痛，佢話：「佢冇病，係過瘦，《金鎖記》個角色食鴉片唔肥得，瘦到乾。上半年做完，會叫佢休息。」

對於孫耀威被外傭偷竊(新聞連結： https://bit.ly/2Bx2y1d )，鄭敬基同太太話：「家賊難防，家傭幫到手係好貼心，但要喺屋企管理多一個人，變咗喺屋企都唔能夠放鬆，o依家都唔請工人，家務自己做番。」鄭敬基仲話媽媽嚇怕咗：「冇咁多信心，唔想再用工人，因為呃咗佢16年感情。冇告個工人，工人已返家鄉。」

精選娛聞，喺晒《娛果》
http://fb.com/appledailyent