電視台競爭激烈，連東亞運火炬傳送咁冇睇頭嘅騷都有人爭住做，但亦有「豬頭骨」節目乏人問津。港台製作教細蚊仔做功課嘅電視節目《上網問功課》，長期以嚟都喺亞視本港台播出，不過今年新學年開學之後，大家唔使開電視問功課嘞，因為兩個免費電視台都唔肯播出。

亞視無綫拒播

呢個問功課節目有廿幾年歷史，以前叫《打電話問功課》，近年追隨上網潮流改名《上網問功課》，逢星期六早上10點至10點半同時在港台網站及亞視本港台播出，亦有安排在香港寬頻重播。呢個節目暑假休息，9月開學恢復出街，港台近日同亞視商討新學年播出安排，以為一切照舊啦，點知亞視忽然一反常態，回覆話「冇合適air-time」，拒絕繼續播出問功課節目。
此處不留人，港台轉敲無綫道門，都要食檸檬，所以新學年開始，《上網問功課》獨家在港台網站直播，日後可以熄咗部電視問功課。兩個免費電視台有四條頻道，竟然都容納唔到半小時問功課節目，況且星期六上晝10點鐘呢啲時間，電視台唔係播陳年舊片就係無聊卡通，有幾多收視率，大家心照，咁都話冇air-time畀小朋友問功課，令人費解。

宜搵星級嘉賓

上個月廣管局舉行三場公聽會，好多市民批評兩間免費電視台節目唔夠多元化，有人認為教育性節目太少，兩個電視台似乎對觀眾意見無動於衷，唔通真係要發第三個免費電視台牌照？
教科書年年改版，問功課節目亦不能一本通書睇到老，因應新學制，據知《上網問功課》會增加通識科內容。電視台唔肯播《上網問功課》，無非都係嫌唔好睇，八方大膽建議港台大改革節目，首先要搵夠份量嘉賓主持，首選係陸叔同青姐，事關每日都有無數散戶打電話搵佢哋問功課，小兒科問題easyjob啦，同場加插爹哋、媽咪攞冧巴環節，變成闔家歡節目，收視有晒保證。最好搵多個客席教授，剛退休嘅任總相信願意效勞，攞命陳、儍強局長有事垂詢，優先接通。

mailto:[email protected]