新股熱爆，噚日截飛嘅中國高速傳動（658），市傳早前疾呼股市有泡沫嘅李首富都有入飛，暗盤價可以升5成云云。中國傳動賣點係所做嘅齒輪可供風力發電所用，但係招股PE一啲都唔平，由於認購超晒額，以上限價計07年PE為40倍，假如上市首日真係升5成，07年PE已高達60倍，雖則話有大摩護航，呢個風力發電概念的確被過份「神」化。
若然唔用環保同風力發電包裝，呢隻新股實際上係一隻重工業股，市場上都有一隻同樣係H股嘅上海集優（2345），其主要業務之一正是生產電站汽輪機葉片，佔去年營業額兩成，但盈利貢獻佔42%，可見係相當賺錢嘅業務，而可用於鐵路、汽車、電動機等的軸承，佔去年營業額及純利分別8.7%及9%。
集團去年全年純利增長71%至2.31億元，每股盈利18.98分，往績PE只係17倍，今年盈利預測2.8億元，07年PE再降至14倍，還未計早前向母公司收購的上海耐特以及上海一個地皮作物流中心。有得比較，上海集優點計都要追落後。

早兩星期歐陽風上國資委網頁發現中國五礦獲批增設房地產為主營業務，噚日有報道，五礦建設（230）管理層正式宣佈呢個消息，並且向記者話，公司會物色具有優厚回報潛質的房地產項目發展，及建立自己於內地房地產的優質品牌，而五礦建設作為中國五礦房地產業務於香港上市的公司，未來一定會以此基礎，使股東得到可觀的回報。簡單嚟講，第一呢間公司會做大做強，第二係會繼續向母公司收購相關資產，兩點足以構成買貨理由。